மதமாற்றம் கட்டாயப்படுத்த யாருக்கும் உரிமை இல்லை: அமித் ஷா

புதுடில்லியில் நடைபெற்ற பழங்குடியின மாநாட்டில் மத்திய உள்துறை அமைச்சர் அமித் ஷா, பொது சிவில் சட்டம் (UCC) குறித்து முக்கிய விளக்கங்களை வழங்கினார். பழங்குடியின சமூகங்களுக்கு இந்த சட்டம் எந்தவித பாதிப்பையும் ஏற்படுத்தாது என்றும், தவறான தகவல்களை நம்ப வேண்டாம் என்றும் அவர் வலியுறுத்தினார். ஆங்கிலேயர்களுக்கு எதிராக பழங்குடியின மக்களுக்காக போராடிய தியாகி பிர்சா முண்டாவின் 150வது பிறந்தநாள் ஆண்டை முன்னிட்டு நடைபெற்ற மாநாட்டில் அமித் ஷா கலந்து கொண்டு உரையாற்றினார். அவர் கூறுகையில், பாஜக ஆளும் மாநிலங்களில் பொது சிவில் சட்டம் அமல்படுத்தப்படும் போது, பழங்குடியின சமூகங்களை அதன் வரம்பிற்கு வெளியே வைக்கும் வகையில் சிறப்பு ஏற்பாடுகள் செய்யப்பட்டுள்ளதாக தெரிவித்தார். மேலும், பொது சிவில் சட்டம் பழங்குடியின மக்களின் பாரம்பரியங்கள், பழக்கவழக்கங்கள் மற்றும் சமூக அடையாளங்களில் எந்தவித தலையீடும் செய்யாது என்று உறுதியளித்தார். நக்சல் வன்முறை காரணமாக பல ஆண்டுகளாக பழங்குடியின மக்களின் வளர்ச்சி பாதிக்கப்பட்டதாகவும், தற்போது நாடு அந்த பிரச்னையிலிருந்து படிப்படியாக விடுபட்டு வருவதாகவும் அமித் ஷா குறிப்பிட்டார். மதமாற்றம் குறித்து பேசிய அவர், ஆசைவார்த்தை, தூண்டுதல் அல்லது கட்டாயத்தின் மூலம் மற்றொரு நபரின் மதநம்பிக்கையை மாற்றுவதற்கு எவருக்கும் உரிமை இல்லை என்று தெரிவித்தார்.