பள்ளிகளில் அரசியல் நிகழ்ச்சிகளுக்கு தடை; விதிமீறினால் கடும் நடவடிக்கை – அமைச்சர் ராஜ்மோகன் எச்சரிக்கை

பள்ளி வளாகங்களில் அரசியல் கட்சிகள் சார்ந்த எந்தவித செயல்பாடுகளும் அனுமதிக்கப்படாது என்றும், விதிமுறைகளை மீறுபவர்கள் மீது கடுமையான நடவடிக்கை எடுக்கப்படும் என்றும் பள்ளிக்கல்வித்துறை அமைச்சர் ராஜ்மோகன் எச்சரித்துள்ளார். சென்னை ஓமந்தூரார் அரசு பல்நோக்கு மருத்துவமனை வளாகத்தில் நடைபெற்ற தமிழ் வளர்ச்சித் துறை விழாவில் பங்கேற்ற அவர், பின்னர் செய்தியாளர்களிடம் பல்வேறு கல்வி தொடர்பான விவகாரங்கள் குறித்து விளக்கம் அளித்தார். முதல்வரின் பிறந்த நாள் கொண்டாட்டங்கள் பள்ளிகளில் நடைபெற்றதாக தொடரப்பட்ட வழக்கில், சென்னை உயர்நீதிமன்றம் தமிழக அரசிடம் விளக்கம் கேட்டிருப்பதாகவும், அதற்கு சட்டரீதியாக அரசு பதிலளிக்கும் என்றும் அமைச்சர் தெரிவித்தார். மேலும், எந்த அரசியல் கட்சியினரும் கட்சிக் கொடி, சின்னங்கள் அல்லது அரசியல் அடையாளங்களுடன் பள்ளிக்குள் நுழையக் கூடாது என்றும், பள்ளிகளில் அரசியல் சார்ந்த நிகழ்ச்சிகள் முற்றிலும் தடை செய்யப்பட்டுள்ளதாகவும் அவர் கூறினார். இதனை மீறி யாரேனும் செயல்பட்டால், சம்பந்தப்பட்டவர்கள் மீது கடுமையான நடவடிக்கை எடுக்கப்படும் என்றும் அமைச்சர் எச்சரித்தார். ஆசிரியர் தகுதித் தேர்வு (TET) வினாத்தாள் கடினமாக இருந்ததாக எழுந்த புகார்கள் தொடர்பாக அதிகாரிகளிடம் அறிக்கை கோரப்பட்டுள்ளதாகவும், வினாத்தாள் தயாரிப்பு நடைமுறைகள் குறித்து ஆய்வு மேற்கொள்ளப்படும் என்றும் அவர் தெரிவித்தார். அரசுப் பள்ளிகள் மூடப்படக் கூடாது என்பதே அரசின் நிலைப்பாடு என்றும், மாணவர் சேர்க்கை குறைவாக உள்ள பள்ளிகளிலும் சேர்க்கைக்கான கால அவகாசம் நீட்டிக்கப்பட்டுள்ளதாகவும் அமைச்சர் கூறினார். மாணவர் சேர்க்கை குறைவதற்கான காரணங்களையும் ஆய்வு செய்ய உள்ளதாக அவர் தெரிவித்தார். சென்னையில் மாதவிடாய் ஏற்பட்ட மாணவி வகுப்பறைக்கு வெளியே நிறுத்தப்பட்டதாக வெளியான புகார் குறித்து விசாரணை நடத்தப்பட்டதாகவும், அது தகவல் தொடர்பு குறைபாடு மட்டுமே என்றும், ஆசிரியர் மீது நடவடிக்கை எடுக்க வேண்டிய அவசியம் இல்லை என்றும் அவர் விளக்கமளித்தார். மேலும், கல்விக் கட்டணம் உள்ளிட்ட காரணங்களால் மாணவர்களின் மாற்றுச் சான்றிதழை (TC) தனியார் பள்ளிகள் நிறுத்தி வைக்கக் கூடாது என்றும் அமைச்சர் வலியுறுத்தினார். இதற்கிடையில், பள்ளிகளில் அரசியல் நிகழ்ச்சிகள் நடத்தப்பட்டதாக தாக்கல் செய்யப்பட்ட மனுவில் சென்னை உயர்நீதிமன்றம் தமிழக அரசிடம் பதில் கோரி விசாரணையை ஒத்திவைத்துள்ளது.