பழநி கோயில் நில பதிவு வழக்கு: சார் பதிவாளருக்கு இடைக்கால முன்ஜாமின்; கூட்டுச் சதி குறித்து சிபிசிஐடி விசாரணை

பழநி தண்டபாணி சுவாமி மடத்திற்கு சொந்தமானதாக கூறப்படும் நிலத்தின் பத்திரப்பதிவு முறைகேடு வழக்கில் தொடர்புடைய சார் பதிவாளருக்கு உயர்நீதிமன்ற மதுரைக் கிளை இடைக்கால முன்ஜாமின் வழங்கியுள்ளது. அதே நேரத்தில், இந்த விவகாரத்தில் கூட்டுச் சதி உள்ளதா என்பதை சிபிசிஐடி விரிவாக விசாரிக்கவும் நீதிமன்றம் உத்தரவிட்டுள்ளது. முறைகேடாக போலி ஆவணங்கள் மூலம் நிலம் பதிவு செய்யப்பட்டதாக குற்றச்சாட்டு எழுந்ததைத் தொடர்ந்து, சார் பதிவாளர் ஜஸ்டின் மணிகண்டன் மீது போலீசார் வழக்குப்பதிவு செய்தனர். இதையடுத்து அவர் முன்ஜாமின் கோரி உயர்நீதிமன்றத்தை அணுகினார். மனுதாரர் தரப்பில், நீதிமன்ற உத்தரவின் அடிப்படையிலேயே ஆவண நடவடிக்கைகள் மேற்கொள்ளப்பட்டதாகவும், பதிவு எண்ணை ஒதுக்கி அடுத்த கட்ட நிர்வாக நடைமுறைகளை மட்டுமே மேற்கொண்டதாகவும் வாதிடப்பட்டது. அரசு மற்றும் கோயில் நிர்வாகம் தரப்பில், கோயிலுக்கு சொந்தமான நிலம் என்பதற்கான ஆட்சேபனைகள் முன்கூட்டியே தெரிவிக்கப்பட்டிருந்த நிலையில், அவசரமாக பதிவு நடைமுறைகள் மேற்கொள்ளப்பட்டதன் பின்னணி குறித்து சந்தேகம் இருப்பதாக தெரிவிக்கப்பட்டது. வழக்கை விசாரித்த நீதிபதி, ஆவணப் பதிவின் பெரும்பாலான செயல்முறைகள் மற்றொரு அதிகாரியால் மேற்கொள்ளப்பட்டிருந்தாலும், இறுதிக்கட்ட நடவடிக்கைகள் எவ்வாறு நிறைவேற்றப்பட்டன என்பது குறித்து முழுமையான விசாரணை அவசியம் எனக் குறிப்பிட்டார். இந்த விவகாரத்தில் கூட்டுச் சதி இருந்ததா என்பதை சிபிசிஐடி ஆராய்ந்து, உறுதியான ஆதாரங்களுடன் அறிக்கை தாக்கல் செய்ய உத்தரவிட்டார். அதுவரை சார் பதிவாளருக்கு இடைக்கால முன்ஜாமின் வழங்கப்பட்டுள்ளதுடன், குறிப்பிட்ட நாட்களில் சிபிசிஐடி அதிகாரிகள் முன் நேரில் ஆஜராகி விசாரணைக்கு ஒத்துழைக்கவும் நீதிமன்றம் உத்தரவிட்டுள்ளது.