'வந்தே மாதரம்' அவமதிப்புக்கு 3 ஆண்டு சிறை? புதிய மசோதாவை மத்திய அரசு அறிமுகப்படுத்துகிறது

தேசிய பாடலான 'வந்தே மாதரம்' பாடலுக்கு சட்டப்பூர்வ பாதுகாப்பை வழங்கும் நோக்கில், புதிய திருத்த மசோதாவை மத்திய அரசு பார்லிமென்ட் மழைக்கால கூட்டத்தொடரில் தாக்கல் செய்ய உள்ளது. இந்த மசோதா நிறைவேற்றப்பட்டால், தேசியக்கொடி மற்றும் தேசிய கீதத்திற்கு வழங்கப்படும் மரியாதையைப் போலவே, 'வந்தே மாதரம்' பாடலுக்கும் சட்ட ரீதியான பாதுகாப்பு வழங்கப்படும். மசோதாவின் முக்கிய அம்சங்களின்படி, 'வந்தே மாதரம்' பாடலை அவமதித்தல், பாடுவதை தடுத்தல், இடையூறு செய்தல் அல்லது சட்டத்தில் குறிப்பிடப்படும் வகையில் அவமரியாதை செய்தல் போன்ற செயல்கள் குற்றமாக கருதப்படலாம். குற்றம் நிரூபிக்கப்பட்டால் அதிகபட்சமாக 3 ஆண்டுகள் வரை சிறைத்தண்டனை விதிக்கப்பட வாய்ப்புள்ளதாக தகவல்கள் தெரிவிக்கின்றன. சுதந்திரப் போராட்டத்தில் முக்கிய பங்கு வகித்த இந்த பாடல், 1950 ஆம் ஆண்டு தேசிய பாடலாக அங்கீகரிக்கப்பட்டது. அண்மையில் அரசு நிகழ்ச்சிகளில் 'வந்தே மாதரம்' மற்றும் தேசிய கீதம் பாடுவது குறித்து மத்திய உள்துறை அமைச்சகம் வழிகாட்டுதல்களையும் வெளியிட்டிருந்தது. புதிய மசோதா பார்லிமென்டில் நிறைவேறிய பின்னரே அதன் இறுதி விதிமுறைகள் மற்றும் சட்ட அமலாக்கம் தெளிவாகும்.