பழனி நில மோசடி விவகாரத்தில் புதிய அதிர்ச்சி: ஆயக்குடி கோவில் நிலமும் முறைகேடாக பதிவு

சென்னை: திண்டுக்கல் மாவட்டம் பழனி தண்டபாணி சுவாமி மடத்தின் நிலம் தொடர்பான முறைகேடு விவகாரம் பரபரப்பை ஏற்படுத்தியுள்ள நிலையில், அதே மாவட்டம் ஆயக்குடியில் உள்ள கோவில் நிலமும் முறைகேடாக பத்திரப்பதிவு செய்யப்பட்டதாக புதிய புகார் எழுந்துள்ளது. பழனி கோவில் கட்டுப்பாட்டில் உள்ள தண்டபாணி சுவாமி மடத்திற்கு சொந்தமான ரூ.108 கோடி மதிப்பிலான நிலம் போலி ஆவணங்கள் மூலம் பத்திரப்பதிவு செய்யப்பட்டதாக புகார் எழுந்தது. பின்னர் அந்தப் பதிவு ரத்து செய்யப்பட்டதுடன், வழக்கில் தொடர்புடைய சிலர் கைது செய்யப்பட்டனர். இந்நிலையில், பழனியை அடுத்த ஆயக்குடியில் உள்ள ஸ்ரீ கன்னிகா பரமேஸ்வரி அம்மன் கோவிலுக்கு சொந்தமான 2.40 ஏக்கர் நிலம், சுமார் ரூ.2 கோடி சந்தை மதிப்புடையதாக கூறப்படும் நிலையில், முறைகேடாக பத்திரப்பதிவு செய்யப்பட்டுள்ளதாக குற்றச்சாட்டு எழுந்துள்ளது. இந்தப் பத்திரப்பதிவு, தண்டபாணி சுவாமி மடத்தின் நிலம் பதிவு செய்யப்பட்ட மறுநாளே நடைபெற்றதாகவும், இரு சம்பவங்களிலும் ஒரே தரப்பைச் சேர்ந்தவர்கள் தொடர்புடையவர்கள் எனவும் ஹிந்து தமிழர் கட்சி தலைவர் ராம ரவிகுமார் தெரிவித்துள்ளார். மேலும், கோவில் நிலத்தை பதிவு செய்யக் கூடாது என அறநிலையத்துறை தரப்பில் முன்கூட்டியே பதிவுத்துறைக்கு மனு அளிக்கப்பட்டிருந்தும், பின்னர் பத்திரப்பதிவு நடைபெற்றதாக அவர் குற்றம்சாட்டியுள்ளார். கோவில் சொத்துக்கள் தொடர்பான அனைத்து சந்தேகத்திற்குரிய பத்திரப்பதிவுகளையும் ஆய்வு செய்ய சிறப்பு குழு அமைக்க வேண்டும் என்றும் அவர் கோரிக்கை விடுத்துள்ளார். இதற்கிடையே, மதுரை மீனாட்சியம்மன் கோவில் அறக்கட்டளை நிலம் தொடர்பான விவகாரத்தில் 19 பேர் மீது காவல் துறை நடவடிக்கை எடுத்துள்ளதாக ஹிந்து சமய அறநிலையத்துறை அமைச்சர் ரமேஷ் தெரிவித்துள்ளார். கோவில் மற்றும் அறக்கட்டளை சொத்துக்களை பாதுகாக்கவும், முறைகேடாக மாற்றப்பட்ட சொத்துக்களை மீட்கவும் நடவடிக்கைகள் தொடர்ந்து மேற்கொள்ளப்பட்டு வருவதாகவும் அமைச்சர் கூறியுள்ளார்.