பெரம்பூரில் பிரசாரத்துக்கு அனுமதி மறுப்பு: ஜனநாயகத்துக்கு எதிரான செயல் என விஜய் குற்றச்சாட்டு

சென்னை: தமிழக வெற்றிக் கழக தலைவர் விஜய், சென்னை பெரம்பூரில் நடைபெற இருந்த தனது தேர்தல் பிரசாரத்திற்கு போலீசார் அனுமதி மறுத்ததை கடுமையாக கண்டித்துள்ளார். இது ஜனநாயகத்துக்கு எதிரான பாசிச நடவடிக்கை என அவர் தெரிவித்துள்ளார். வரவிருக்கும் தமிழக சட்டசபைத் தேர்தலை முன்னிட்டு, பெரம்பூர் தொகுதியில் போட்டியிடும் விஜய், நாளை காலை 10 மணிக்கு தனது பிரசாரத்தை துவக்க திட்டமிட்டிருந்தார். இதற்காக எம்கேபி நகர் பகுதியில் அனுமதி கோரி விண்ணப்பிக்கப்பட்டது. ஆனால், அந்த இடம் குறுகலானது, அதிகபட்சம் 3,000 பேர் மட்டுமே கூட முடியும், பாதுகாப்பு சிக்கல்கள் ஏற்படும் அபாயம் உள்ளது எனக் கூறி போலீசார் அனுமதி மறுத்துள்ளனர். மாற்று இடத்தில் நிகழ்ச்சி நடத்த விண்ணப்பிக்குமாறு அறிவுறுத்தப்பட்டுள்ளது. இதற்கு எதிராக விஜய் வெளியிட்ட அறிக்கையில், “நிகழ்ச்சிக்கு முன்பே திடீரென அந்த இடத்தில் பள்ளம் தோண்டப்பட்டு தடுப்புகள் வைக்கப்பட்டுள்ளன. இது திட்டமிட்ட தடையாகும். அதிகாரிகள் சிலர் ஆளுங்கட்சியின் அழுத்தத்தில் செயல்படுகிறார்கள் என்ற சந்தேகம் எழுகிறது” என கூறியுள்ளார். மேலும், திமுக அரசு தனது கட்சியின் பிரசாரங்களுக்கு தொடர்ந்து தடைகள் ஏற்படுத்தி வருவதாகவும், இது ஜனநாயக உரிமைகளை ஒடுக்க முயற்சி எனவும் அவர் குற்றம் சாட்டினார். வரும் தேர்தலில் மக்கள் இதற்கு பதிலளிப்பார்கள் என்றும் தெரிவித்துள்ளார்.