பள்ளிகளில் விபூதி, குங்குமம் அணிவதில் தவறில்லை: அமைச்சர் ராஜ்மோகன் விளக்கம்

மதுரையில் செய்தியாளர்களை சந்தித்த பள்ளிக்கல்வித்துறை அமைச்சர் ராஜ்மோகன், மாணவர்கள் விபூதி மற்றும் குங்குமம் அணிந்து பள்ளிக்கு வருவது தவறல்ல என்று தெளிவுபடுத்தினார். பள்ளிகளில் நிலவும் ஆசிரியர் காலியிடங்களை விரைவில் நிரப்ப நடவடிக்கை எடுக்கப்படும் என்றும், நீதிமன்றங்களில் நிலுவையில் உள்ள பிரச்சினைகளுக்கு சட்டரீதியான தீர்வு காணப்படும் என்றும் அவர் தெரிவித்தார். அண்மையில் மாணவர்கள் ஜாதி மற்றும் மத அடையாளங்களுடன் பள்ளிக்கு வரக்கூடாது என்ற கருத்து குறித்து எழுப்பப்பட்ட கேள்விக்கு பதிலளித்த அமைச்சர், சிலர் மாணவர்களிடையே ஜாதி உணர்வுகளை தூண்ட முயற்சிப்பதாகக் கூறினார். அதனைத் தடுக்கவே அந்த கருத்து தெரிவிக்கப்பட்டதாகவும், மத நம்பிக்கைகளை வெளிப்படுத்தும் விபூதி, குங்குமம் போன்றவற்றுக்கு எந்தத் தடையும் இல்லை என்றும் விளக்கமளித்தார். மேலும், தானே விபூதி மற்றும் குங்குமம் அணிந்தபடியே பள்ளி ஆய்வுகளுக்கு செல்வதாகவும், மாணவர்கள் அவற்றை அணிந்து வருவதில் தவறு எதுவும் இல்லை என்றும் கூறினார். அரசியல் குறித்த கேள்விக்கு பதிலளித்த அவர், அமைச்சர் ஆதவ் அர்ஜுனா திறமையான நிர்வாகி என்றும், அவரது செயல்பாடுகள் பல மாற்றங்களை ஏற்படுத்தியுள்ளதால் எதிர்க்கட்சிகள் விமர்சனம் செய்வதாகவும் தெரிவித்தார். அதன்பின் மதுரை அருகே உள்ள அரசு மாதிரி உண்டு உறைவிடப் பள்ளியில் ஆய்வு மேற்கொண்ட அமைச்சர், மாணவர்கள் தங்கள் குறைகளை நேரடியாக தெரிவிக்கலாம் என்றும், அவற்றை உடனடியாக தீர்க்க நடவடிக்கை எடுப்பேன் என்றும் உறுதியளித்தார்.