தமிழக முதல்வராக நடிகர் விஜய் பதவியேற்பு – கூட்டணி ஆதரவுடன் ஆட்சி அமைப்பு

தமிழக அரசியல் வரலாற்றில் புதிய திருப்பமாக, நடிகரும் தமிழக வெற்றிக் கழகத்தின் தலைவருமான விஜய், இன்று காலை 10:00 மணிக்கு முதல்வராக பதவியேற்க உள்ளார். சமீபத்தில் நடைபெற்ற சட்டசபை தேர்தலில் 108 இடங்களில் வெற்றி பெற்ற அவரது கட்சி, தனிப்பெரும் கட்சியாக உருவெடுத்துள்ளது. ஆட்சியை அமைக்க தேவையான 118 எம்.எல்.ஏ.க்களின் ஆதரவை பெற, விஜய் பல கட்சிகளுடன் பேச்சுவார்த்தை நடத்தினார். ஆரம்பத்தில் சில கட்சிகள் ஆதரவை மறுத்ததால் சிக்கல் ஏற்பட்டது. குறிப்பாக இந்திய யூனியன் முஸ்லிம் லீக் மற்றும் அ.ம.மு.க. சார்பில் எதிர்ப்பு எழுந்தது. பின்னர் விடுதலை சிறுத்தைகள் கட்சி தலைவர் திருமாவளவன் ஆதரவு வழங்கியதையடுத்து, முஸ்லிம் லீக்கும் ஆதரவு அளித்தது. இதனால் மார்க்சிஸ்ட், இந்திய கம்யூனிஸ்ட், காங்கிரஸ் உள்ளிட்ட கட்சிகளின் ஆதரவுடன் மொத்த ஆதரவு 120 ஆக உயர்ந்தது. நான்கு முறை கவர்னரை சந்தித்த பிறகு, விஜயை முதல்வராக நியமிக்கும் ஆணையை கவர்னர் ராஜேந்திர அர்லேக்கர் வழங்கினார். இன்று நேரு உள் விளையாட்டரங்கில் நடைபெறும் விழாவில் விஜய் பதவியேற்கிறார். தமிழகத்தில் ராஜாஜி முதல் மு.க. ஸ்டாலின் வரை 12 முதல்வர்கள் பதவி வகித்த நிலையில், நபர் அடிப்படையில் விஜய் 13வது முதல்வராக பதவியேற்கிறார். 59 ஆண்டுகளுக்குப் பிறகு, காங்கிரஸ் கட்சி மீண்டும் தமிழக ஆட்சியில் பங்கெடுக்க உள்ளது. தி.மு.க. மற்றும் அ.தி.மு.க. ஆதிக்கத்துக்கு இடையில், புதிய கூட்டணி ஆட்சி உருவாகியுள்ளது என்பது குறிப்பிடத்தக்கது. கவர்னர் உத்தரவின்படி, வரும் 13ம் தேதிக்குள் சட்டசபையில் பெரும்பான்மையை நிரூபிக்க வேண்டும். அதற்கான நடவடிக்கைகள் விரைவில் மேற்கொள்ளப்படும்.