தமிழக உயர்கல்வி நெருக்கடி | 12 பல்கலைகளில் துணைவேந்தர் இல்லை

தமிழக உயர்கல்வித் துறையில் நிர்வாக வெற்றிடம் தீவிர கவலையை ஏற்படுத்தியுள்ளது. சென்னை, அண்ணா, மதுரை காமராஜ், பாரதிதாசன், பெரியார் உள்ளிட்ட 12 பல்கலைக்கழகங்களில் துணைவேந்தர் பதவிகள் காலியாக உள்ளன. கவர்னர் மற்றும் மாநில அரசுக்கு இடையேயான மோதல் காரணமாக துணைவேந்தர் நியமனங்கள் நீண்ட காலமாக நிலுவையில் உள்ளதாக கூறப்படுகிறது. இதனால் பல்கலைக்கழகங்களில் ஆராய்ச்சி திட்டங்கள், புதிய பாடத்திட்டங்கள், தேசிய மற்றும் சர்வதேச கல்வி ஒத்துழைப்புகள் பாதிக்கப்பட்டுள்ளன. குறிப்பாக மதுரை காமராஜ் பல்கலைக்கழகத்தில் பதிவாளர், தேர்வாணையர், டீன் உள்ளிட்ட முக்கிய நிர்வாக பதவிகளும் காலியாக இருப்பதாக தகவல் வெளியாகியுள்ளது. இதனுடன், தமிழகத்தில் உள்ள 188 அரசு கலை மற்றும் அறிவியல் கல்லூரிகளில் 105 கல்லூரிகளுக்கு முதல்வர்கள் இல்லாத நிலையும் நீடிக்கிறது. இதனால் கல்வி நிர்வாகம், மாணவர் சேவைகள் மற்றும் கல்வித் தர மேம்பாட்டு நடவடிக்கைகள் பாதிக்கப்படுவதாக ஆசிரியர் அமைப்புகள் குற்றம்சாட்டுகின்றன. உயர்கல்வி துறையில் நிலவும் பிரச்னைகளை தீர்க்க மாநில அரசு விரைந்து நடவடிக்கை எடுக்க வேண்டும் என கல்வியாளர்கள் வலியுறுத்தியுள்ளனர்.