தமிழகத்தில் ஆட்சி யார்? 116-116 சமநிலை; விஜய் பெரும்பான்மைக்கு இன்னும் ஒரு படி தூரம்

சென்னை: தமிழக அரசியல் சூழல் தற்போது மிகவும் பரபரப்பாக மாறியுள்ளது. தமிழக வெற்றிக் கழக தலைவர் விஜய் தலைமையிலான கூட்டணி, ஆட்சி அமைக்க தேவையான 118 எம்.எல்.ஏ.க்களில் 116 ஆதரவுடன் பெரும்பான்மையை நெருங்கியுள்ளது. அதேநேரத்தில், மு.க. ஸ்டாலின் தலைமையிலான தி.மு.க. மற்றும் எடப்பாடி கே. பழனிசாமி தலைமையிலான அ.தி.மு.க. கூட்டணிக்கும் 116 எம்.எல்.ஏ.க்கள் ஆதரவு இருப்பதால் கடும் அரசியல் குழப்பம் நிலவுகிறது. மார்க்சிஸ்ட் மற்றும் இந்திய கம்யூனிஸ்ட் கட்சிகள் விஜய்க்கு ஆதரவு அளித்து கடிதம் வழங்கியுள்ளன. விடுதலை சிறுத்தைகள் கட்சியின் தலைவர் தொல். திருமாவளவன் இன்று தனது முடிவை அறிவிப்பார் என கூறியுள்ளார். அவரது முடிவு தான் ஆட்சி அமைப்பில் முக்கிய திருப்பமாக பார்க்கப்படுகிறது. இதற்கிடையில், அ.ம.மு.க. எம்.எல்.ஏ. காமராஜ் காணாமல் போனதாக குற்றச்சாட்டு எழுந்தது. ஆனால் பின்னர் அவர் தோன்றி, தனது பெயரில் வெளியான ஆதரவு கடிதம் போலியானது என தெரிவித்துள்ளார். இதனால் “குதிரை பேரம்” குறித்த குற்றச்சாட்டுகள் அதிகரித்துள்ளன. இந்த சூழலில், கவர்னர் ராஜேந்திர அர்லேக்கர், 118 எம்.எல்.ஏ. ஆதரவு நிரூபிக்கப்பட்டால் மட்டுமே ஆட்சி அமைக்க அழைப்பு விடுப்பார் எனத் தெரிவித்துள்ளார். வி.சி.க. ஆதரவு கிடைத்தால் விஜய் தலைமையிலான அரசு உருவாகும் வாய்ப்பு உள்ளது. இல்லையெனில் மாற்று அரசியல் அமைப்புகள் அல்லது கவர்னர் ஆட்சி அமலுக்கு வரலாம் என அரசியல் வட்டாரங்கள் கூறுகின்றன.