தென் மாநில முதல்வர்கள் மாநாடு: புதுச்சேரி முதல்வர் ரங்கசாமி புறக்கணிக்க முடிவு

சென்னை அருகே கோவளத்தில் மத்திய உள்துறை அமைச்சர் அமித் ஷா தலைமையில் இன்று நடைபெறும் தென் மாநில முதல்வர்கள் மாநாட்டில் பங்கேற்க புதுச்சேரி முதல்வர் ரங்கசாமி தயக்கம் காட்டியுள்ளதாக தகவல் வெளியாகியுள்ளது. இந்த மாநாட்டில் தென் மாநிலங்களைச் சேர்ந்த முதல்வர்கள் மற்றும் முக்கிய நிர்வாகிகள் பங்கேற்க அழைப்பு விடுக்கப்பட்டுள்ளது. புதுச்சேரியில் இருந்து கவர்னர் கைலாஷ்நாதன் மற்றும் முதல்வர் ரங்கசாமி ஆகிய இருவருக்கும் அழைப்பு விடுக்கப்பட்டுள்ளது. புதுச்சேரி யூனியன் பிரதேசமாக இருப்பதால், கவர்னரும் நிர்வாக அதிகாரியாக மாநாட்டில் பங்கேற்க அழைக்கப்பட்டுள்ளார். இதனால் முதல்வர் ரங்கசாமிக்கு மாநாட்டில் வழங்கப்படும் முக்கியத்துவம் தொடர்பாக அதிருப்தி ஏற்பட்டுள்ளதாக கூறப்படுகிறது. சட்டசபை மற்றும் மக்களால் தேர்ந்தெடுக்கப்பட்ட அரசு இருந்தாலும், யூனியன் பிரதேச நிர்வாகத்தில் கவர்னருக்கு உள்ள அதிகாரம் காரணமாக, மாநாட்டில் கவர்னருக்கு முன்னுரிமை வழங்கப்படலாம் என்ற கருத்து நிலவுகிறது. மேலும், புதுச்சேரியின் ஒரே பிரச்னைகள் தொடர்பாக கவர்னரும் முதல்வரும் தனித்தனியாக கருத்துகளை தெரிவிக்க வேண்டிய சூழல் ஏற்படலாம் என்பதும் ரங்கசாமியின் முடிவுக்கு காரணமாக கூறப்படுகிறது. இதையடுத்து, தென் மாநில முதல்வர்கள் மாநாட்டை புறக்கணிக்க ரங்கசாமி முடிவு செய்துள்ளதாக தகவல் வெளியாகியுள்ளது. இருப்பினும், அவரை மாநாட்டில் பங்கேற்கச் செய்ய சமாதானப்படுத்தும் முயற்சிகள் நடைபெற்று வருவதாகவும் கூறப்படுகிறது.