பாகிஸ்தானை 5-3 என வீழ்த்திய இந்தியா; உலக கோப்பை ஹாக்கியில் அடுத்த சுற்றுக்கு முன்னேற்றம்

ஆம்ஸ்டல்வீன்: உலக கோப்பை ஹாக்கி தொடரில் பாகிஸ்தானை 5-3 என்ற கோல் கணக்கில் வீழ்த்திய இந்திய ஆண்கள் அணி, அரையிறுதிக்கான இரண்டாவது சுற்றுக்கு முன்னேறியது. பெல்ஜியம் மற்றும் நெதர்லாந்தில் நடைபெற்று வரும் 16வது உலக கோப்பை ஹாக்கி தொடரில், இந்திய அணி 'டி' பிரிவில் இடம்பெற்றுள்ளது. முதல் போட்டியில் வேல்சை 3-1 என வீழ்த்திய இந்தியா, அடுத்த போட்டியில் இங்கிலாந்திடம் 2-4 என தோல்வியடைந்தது. அரையிறுதிக்கான அடுத்த சுற்றுக்கு முன்னேற பாகிஸ்தானுக்கு எதிரான போட்டியில் வெற்றி பெற வேண்டிய கட்டாயத்தில் இந்திய அணி களமிறங்கியது. போட்டி தொடங்கிய 5வது நிமிடத்தில் கிடைத்த பெனால்டி கார்னர் வாய்ப்பை கேப்டன் ஹர்மன்பிரீத் சிங் கோலாக மாற்றினார். தொடர்ந்து அபிஷேக் கோல் அடிக்க, 21வது நிமிடத்தில் ஹர்மன்பிரீத் சிங் மீண்டும் கோல் அடித்து இந்தியாவின் முன்னிலையை வலுப்படுத்தினார். பாகிஸ்தான் சார்பில் அப்துல் ஹன்னன் கோல் அடித்தாலும், இந்தியாவின் அபிஷேக் மற்றும் பாகிஸ்தானின் சபியன் தலா ஒரு கோல் அடித்தனர். முதல் பாதியில் இந்தியா 4-2 என முன்னிலை பெற்றது. இரண்டாவது பாதியில் இந்தியாவுக்கு கிடைத்த பெனால்டி வாய்ப்பில் ஹர்திக் சிங் கோல் அடித்தார். பாகிஸ்தானின் ஹன்னன் தனது இரண்டாவது கோலை அடித்தபோதும், இந்திய அணி தொடர்ந்து முன்னிலை வகித்தது. கடைசி கட்டத்தில் இந்திய வீரர் ஆதித்யாவுக்கு எல்லோ கார்டு வழங்கப்பட்டதால், இந்தியா 10 வீரர்களுடன் விளையாட வேண்டிய நிலை ஏற்பட்டது. இருப்பினும் சிறப்பாக தற்காத்துக் கொண்ட இந்திய அணி 5-3 என்ற கணக்கில் வெற்றி பெற்றது. இந்த வெற்றியின் மூலம் 'டி' பிரிவில் இங்கிலாந்து 9 புள்ளிகளுடன் முதலிடத்திலும், இந்தியா 6 புள்ளிகளுடன் இரண்டாவது இடத்திலும் முடித்து, அரையிறுதிக்கான இரண்டாவது சுற்றுக்கு முன்னேறின. இரண்டாவது சுற்றில் இந்திய அணி 'இ' பிரிவில் இடம்பெற்று, 'ஏ' பிரிவில் முதல் இரண்டு இடங்களை பிடிக்கும் அணிகளுடன் விளையாடும். அந்த சுற்றின் முடிவில் முதல் இரண்டு இடங்களை பிடித்தால் இந்திய அணிக்கு அரையிறுதிக்கான வாய்ப்பு கிடைக்கும்.