தி.மு.க. கூட்டணியில் இருந்து முஸ்லிம் லீக் விலகல்; ‘தனிமரம்’ ஆகும் சூழல் உருவானதா?

சென்னையின் ராயபுரத்தில் நடைபெற்ற முஸ்லிம் லீக் மாநில பொதுக்குழு கூட்டத்தில், தற்போதைய அரசியல் சூழலில் தி.மு.க. கூட்டணியில் தொடர்ந்து பயணிக்க இயலாது என்று கட்சி அதிகாரப்பூர்வமாக அறிவித்துள்ளது. முஸ்லிம் லீக் தலைவர் காதர் மொகிதீன் தலைமையில் நடைபெற்ற கூட்டத்தில், சட்டசபைத் தேர்தலுக்குப் பிறகு தமிழக வெற்றிக் கழக அரசுக்கு ஆதரவளித்துள்ளதாகவும், முதல்வர் விஜய் தலைமையிலான அரசில் கட்சி அங்கம் வகிப்பதாகவும் தெரிவிக்கப்பட்டது. மேலும், வரவிருக்கும் சட்டசபை இடைத்தேர்தல், உள்ளாட்சித் தேர்தல் மற்றும் லோக்சபா தேர்தல்களிலும் த.வெ.க.வுடன் இணைந்து செயல்படுவது குறித்து சாதகமான நிலைப்பாடு இருப்பதாக காதர் மொகிதீன் கூறினார். இதனிடையே, தி.மு.க. கூட்டணியில் இருந்த காங்கிரஸ், இடதுசாரி கட்சிகள் மற்றும் பிற கூட்டணி கட்சிகளும் விலகும் மனநிலையில் இருப்பதாக அரசியல் வட்டாரங்களில் பேசப்படுகிறது. இதனால், நீண்டகாலமாக ‘கொள்கை கூட்டணி’ என அழைக்கப்பட்ட தி.மு.க. கூட்டணி தற்போது மறுசீரமைப்பின் அவசியத்தை எதிர்கொண்டு வருவதாகக் கூறப்படுகிறது. முஸ்லிம் லீக் விலகல் குறித்து தி.மு.க. முன்னாள் எம்.பி. அப்துல்லா பதிலளிக்கையில், முஸ்லிம்களுக்காக தொடர்ந்து குரல் கொடுத்த கட்சி தி.மு.க. தான் என்றும், அரசியல் சூழ்நிலைக்காக தேவையற்ற விமர்சனங்களை முன்வைக்க வேண்டாம் என்றும் தெரிவித்துள்ளார்.