துபாயில் மனித வடிவ ரோபோக்களுக்கு பாரம்பரிய திருமணம்; தொழில்நுட்ப உலகில் வைரல் நிகழ்வு

ஐக்கிய அரபு எமிரேட்ஸில் மனித வடிவ ரோபோக்களை மையமாகக் கொண்ட வித்தியாசமான நிகழ்வு உலகளவில் கவனம் பெற்றுள்ளது. பிரபலமான 'பு சுனைதா' என்ற ஹியூமனாய்டு (Humanoid) ரோபோவும், 'மொசா' என்ற மற்றொரு ரோபோவும் பாரம்பரிய எமிரேட்ஸ் முறைப்படி குறியீட்டு (symbolic) திருமண நிகழ்வில் பங்கேற்றனர். 'யூனிட்ரீ ஜி1' (Unitree G1) வகையைச் சேர்ந்த பு சுனைதா, மனிதர்களைப் போல நடந்து செயல்படும் திறனால் கடந்த ஆண்டு சமூக வலைதளங்களில் பெரும் வரவேற்பைப் பெற்றது. தொழில்நுட்ப விழிப்புணர்வு மற்றும் ரோபோடிக்ஸ் முன்னேற்றத்தை வெளிப்படுத்தும் நோக்கில் இந்த நிகழ்ச்சி ஏற்பாடு செய்யப்பட்டதாக தெரிவிக்கப்பட்டுள்ளது. திருமண நிகழ்வில் மணமகன் பாரம்பரிய கண்டுரா உடையிலும், மணமகள் அபயா அணிந்தும் பங்கேற்றனர். எமிரேட்ஸ் பாரம்பரிய இசை, கலாச்சார நிகழ்ச்சிகள், வாணவேடிக்கை மற்றும் விருந்தினர்களின் நடன நிகழ்ச்சிகளுடன் விழா கோலாகலமாக நடைபெற்றது. இந்த நிகழ்வின் புகைப்படங்கள் மற்றும் வீடியோக்கள் சமூக வலைதளங்களில் வேகமாக பரவி, தொழில்நுட்பம் மற்றும் கலாச்சாரத்தின் தனித்துவமான இணைப்பாக பலரும் கருத்து தெரிவித்து வருகின்றனர்.