ஆர்.எஸ்.எஸ். நிர்வாக மாற்றம்: மாநிலங்களுக்கு பதிலாக 80 கோட்டங்கள் உருவாக்கம்

சென்னை: ராஷ்ட்ரீய ஸ்வயம்சேவக் சங்க் (ஆர்.எஸ்.எஸ்.) தனது நிர்வாக அமைப்பில் முக்கிய மாற்றத்தை அறிவித்துள்ளது. இதன்படி, இதுவரை பயன்படுத்தப்பட்ட மாநில அடிப்படையிலான அமைப்பு நீக்கப்பட்டு, முழு இந்தியாவும் 80 கோட்டங்களாக (சம்பாக்) பிரிக்கப்பட உள்ளது. ஆர்.எஸ்.எஸ். அமைப்பில் தற்போது தாலுகா, மாவட்டம், விபாக், மாநிலம், ஷேத்ரம் போன்ற நிர்வாக அடுக்குகள் உள்ளன. பெரிய மாநிலங்கள் ஏற்கனவே இரண்டு முதல் ஆறு பகுதிகளாக பிரிக்கப்பட்டுள்ளன. தமிழகம் கூட இரண்டு மாநில அலகுகளாக செயல்பட்டு வந்தது. ஆர்.எஸ்.எஸ். நிறுவப்பட்டு 100 ஆண்டுகள் நிறைவடைந்துள்ள நிலையில், அதன் வளர்ச்சியை மேலும் விரிவுபடுத்தும் நோக்கில் இந்த மாற்றம் கொண்டு வரப்பட்டுள்ளது. இந்த அறிவிப்பை, தத்தாத்ரேய ஹொசபலே ஹரியானாவில் நடைபெற்ற பொதுக்குழு கூட்டத்தில் வெளியிட்டார். புதிய அமைப்பின் கீழ், மாநிலங்கள் முழுமையாக நீக்கப்பட்டு, அதன் பதிலாக 80 கோட்டங்கள் உருவாக்கப்படும். ஒவ்வொரு நான்கு முதல் ஆறு கோட்டங்கள் இணைந்து ‘பிரதேசம்’ என அழைக்கப்படும். ஏற்கனவே உள்ள விபாக் மற்றும் ஷேத்ரம் அமைப்புகள் தொடரும். இந்த மாற்றம் மூலம் நிர்வாக அலகுகள் சிறியதாக மாறுவதால், அமைப்பின் செயல்பாடுகளை எளிதாக விரிவுபடுத்தவும், அனைத்து பகுதிகளிலும் கவனம் செலுத்தவும் உதவும் என்று தெரிவிக்கப்பட்டுள்ளது. இந்த புதிய கட்டமைப்பு, ஆர்.எஸ்.எஸ். நூற்றாண்டு விழா முடிந்ததும் நடைமுறைக்கு வரும். அதுவரை தற்போதைய அமைப்பு தொடரும். புதிய மாற்றங்களின் அடிப்படையில், தமிழகம் மட்டும் ஆறு கோட்டங்களாக பிரிக்கப்பட உள்ளது. இதன் மூலம் மாநில தலைவர், செயலர் போன்ற பதவிகள் மாற்றப்பட்டு, கோட்டத் தலைவர், கோட்ட செயலர் போன்ற புதிய பொறுப்புகள் அறிமுகப்படுத்தப்படும்.