டெண்டர் ரத்து செய்வதிலும் முறைகேடா? அமைச்சர்கள் மீது அதிர்ச்சி புகார்

முதல்வர் விஜய் தலைமையிலான அரசு பொறுப்பேற்ற பிறகு, நகராட்சி நிர்வாகத் துறையில் 2,300க்கும் மேற்பட்ட டெண்டர்கள் ரத்து செய்யப்பட்டதாக கூறப்படுகிறது. அதிக விலைப்புள்ளிகள் உள்ளிட்ட காரணங்களால் டெண்டர்கள் ரத்து செய்யப்பட்டதாக அரசு தரப்பில் தெரிவிக்கப்பட்ட நிலையில், குறைந்த விலைப்புள்ளி கோரிய நிறுவனங்களின் டெண்டர்களும் சில இடங்களில் ரத்து செய்யப்பட்டதாக அதிகாரிகள் தரப்பில் புகார் எழுந்துள்ளது. ஈரோடு மாநகராட்சியில் எல்.இ.டி., விளக்குகள் அமைப்பதற்கான டெண்டரில், அரசு நிர்ணயித்த மதிப்பை விட 25 சதவீதத்திற்கும் குறைவாக விலைப்புள்ளி கோரிய நிறுவனம் தேர்வு செய்யப்பட்டதாக கூறப்படுகிறது. ஆனால், அந்த நிறுவனத்திற்கு பணி ஆணை வழங்கப்படாமல், குறிப்பிட்ட விதியை பயன்படுத்தி டெண்டர் ரத்து செய்யப்பட்டதாக புகார் தெரிவிக்கப்பட்டுள்ளது. மேலும், சில உள்ளூர் அரசியல் பிரமுகர்கள் மற்றும் அமைச்சர்கள் தரப்பில் ஒப்பந்ததாரர்களிடம் கமிஷன் கேட்கப்படுவதாகவும், அதற்கு உடன்படாத நிறுவனங்களின் டெண்டர்கள் ரத்து செய்யப்படுவதாகவும் அதிகாரிகள் குற்றம்சாட்டியுள்ளனர். தாம்பரம், திருப்பூர், தஞ்சாவூர், புதுக்கோட்டை உள்ளிட்ட நகர்ப்புற உள்ளாட்சி அமைப்புகளிலும் இதுபோன்ற தலையீடுகள் இருப்பதாக புகார்கள் எழுந்துள்ளன. இந்த குற்றச்சாட்டுகள் குறித்து உரிய விசாரணை நடத்தப்பட வேண்டும் என்ற கோரிக்கையும் எழுந்துள்ளது.