மீனம்பாக்கம் விமான நிலையத்தை சுற்றிய குப்பை: விமான பாதுகாப்புக்கு பெரும் அச்சுறுத்தல்

சென்னை மீனம்பாக்கம் விமான நிலையத்தைச் சுற்றியுள்ள பகுதிகளில் திறந்தவெளியில் கொட்டப்படும் குப்பைக் கழிவுகள் விமானப் பாதுகாப்புக்கு பெரும் அச்சுறுத்தலாக மாறியுள்ளன. கொளப்பாக்கம், கெருகம்பாக்கம், தரப்பாக்கம் உள்ளிட்ட ஊராட்சிகளில் குவியும் பிளாஸ்டிக், மாமிசக் கழிவுகள் மற்றும் இறந்த விலங்குகளின் உடல்கள் காரணமாக பருந்துகள் உள்ளிட்ட பறவைகள் அதிகளவில் கூடுகின்றன. சமீபத்தில் லண்டனில் இருந்து சென்னை வந்த பிரிட்டிஷ் ஏர்வேஸ் விமானம் தரையிறங்கும் முன் பறவை மோதி சேதமடைந்தது. அதேபோல், கடந்த மாதம் மலேஷியா செல்ல இருந்த ஏர் ஏசியா விமானத்தின் இன்ஜினுக்குள் பறவை நுழைந்ததால் அவசரமாக தரையிறக்கப்பட்டது. இந்த தொடர் சம்பவங்கள் விமான நிலையத்தைச் சுற்றியுள்ள குப்பை மேலாண்மை குறைபாடுகளை மீண்டும் வெளிச்சத்திற்கு கொண்டு வந்துள்ளன. விமான நிலையத்தின் 10 கி.மீ. சுற்றளவில் திறந்தவெளி குப்பை கிடங்குகள் இருக்கக் கூடாது என்ற விதிமுறைகள் இருந்தாலும், பல இடங்களில் விதிமீறல்கள் தொடர்கின்றன. இதனால் பறவைகள் அதிகரித்து, Bird Strike அபாயம் உருவாகியுள்ளது. விமானப் போக்குவரத்து நிபுணர்கள், தமிழக அரசும் விமான நிலைய ஆணையமும் இணைந்து உடனடி நடவடிக்கை எடுத்து, குப்பைகளை அறிவியல் முறையில் அகற்றி, விமானப் பாதுகாப்பை உறுதி செய்ய வேண்டும் என வலியுறுத்தியுள்ளனர்.