திமுக ஆட்சி தோல்வி: விரைவில் மாற்றம் வரும் – விஜய் கடும் விமர்சனம்

சென்னை: பெரம்பூர் தொகுதியில் தனது தேர்தல் பிரசாரத்தை தொடங்கிய தவெக தலைவர் விஜய், திமுக அரசை கடுமையாக விமர்சித்தார். மக்களுக்கு எந்த பயனும் இல்லாத ஆட்சியை நடத்தி வரும் முதல்வர் ஸ்டாலின் தலைமையிலான அரசு விரைவில் முடிவுக்கு வரும் என்று அவர் தெரிவித்தார். பெரம்பூரில் உள்ள மத நல்லிணக்கச் சின்னங்களான தேவாலயம், கோவில் மற்றும் மசூதிகளை குறிப்பிட்டு, அங்கு பிரசாரம் தொடங்குவது மக்களின் ஆசீர்வாதத்துடன் தொடங்கும் நல்ல தொடக்கம் என விஜய் கூறினார். தமிழகத்தில் பெண்கள் மற்றும் பொதுமக்களுக்கு பாதுகாப்பு குறைந்து விட்டதாகவும், சட்டம்-ஒழுங்கு சீர்குலைந்துள்ளதாகவும் அவர் குற்றம்சாட்டினார். இரவு நேரங்களில் பெண்கள் வெளியே செல்ல கூட பயப்பட வேண்டிய நிலை உருவாகியுள்ளது என்று தெரிவித்தார். மேலும், திமுக ஆட்சியில் ஊழல் அதிகரித்துள்ளதாக கூறிய விஜய், டாஸ்மாக் மற்றும் நகராட்சித்துறைகளில் ஆயிரக்கணக்கான கோடி ரூபாய் முறைகேடுகள் நடந்துள்ளதாக குற்றம் சாட்டினார். வேலைவாய்ப்புக்காக இளைஞர்கள் அவதிப்படுகிறார்கள் என்றும், லஞ்சம் கொடுத்தும் வேலை கிடைக்காத நிலை ஏற்பட்டுள்ளதாகவும் கூறினார். வரவிருக்கும் தேர்தலில் மக்கள் மாற்றத்தை ஏற்படுத்த வேண்டும் என்று அழைப்பு விடுத்த அவர், ஏப்ரல் 23ஆம் தேதி நடைபெறும் வாக்குப்பதிவில் விசில் சின்னத்திற்கு வாக்களிக்குமாறு கேட்டுக் கொண்டார்.