டில்லி உயர்நீதிமன்றம்: ஈஷா குறித்த சர்ச்சை உள்ளடக்கங்களை நீக்க இடைக்கால உத்தரவு

ஈஷா அறக்கட்டளை மற்றும் அதன் நிறுவனர் சத்குரு ஜக்கி வாசுதேவ் குறித்து வெளியிடப்பட்டதாக கூறப்படும் சர்ச்சை மற்றும் அவதூறு உள்ளடக்கங்கள் தொடர்பாக முக்கியமான முன்னேற்றம் ஏற்பட்டுள்ளது. இந்த விவகாரத்தில், டில்லி உயர்நீதிமன்றம் இடைக்கால உத்தரவை வழங்கியுள்ளது. குறிப்பாக, நக்கீரன் வெளியிட்ட சில வீடியோக்கள் மற்றும் கட்டுரைகள் நீக்கப்பட வேண்டும் என நீதிமன்றம் உத்தரவிட்டுள்ளது. இந்த வழக்கு 2024ஆம் ஆண்டு ஈஷா அறக்கட்டளை சார்பில் தாக்கல் செய்யப்பட்டது. அதில், ஆதாரமற்ற மற்றும் தவறான தகவல்கள் வெளியிடப்படுவதாக குற்றம்சாட்டி, அவற்றை நீக்கவும், எதிர்காலத்தில் இதுபோன்ற வெளியீடுகளைத் தடுக்கவும் கோரப்பட்டது. வழக்கின் விசாரணை டிசம்பர் மாதத்தில் நடைபெற்றது. இருதரப்பு வாதங்களையும் கேட்ட நீதிபதி இடைக்கால உத்தரவை தற்போது வழங்கியுள்ளார். இதுகுறித்து ஈஷா அறக்கட்டளை வெளியிட்ட அறிக்கையில், நீதிமன்றத்தின் தீர்ப்பை வரவேற்றுள்ளது. மேலும், ஆதாரமற்ற குற்றச்சாட்டுகள் மற்றும் தவறான தகவல்கள் பொதுமக்களை தவறாக வழிநடத்துகின்றன என்றும், இத்தகைய செயல்களுக்கு எதிராக சட்ட நடவடிக்கை தொடர்ந்து எடுக்கப்படும் என்றும் தெரிவித்துள்ளது.