விஸ்வ ஹிந்து பரிஷத் மூத்த தலைவர் எஸ். வேதாந்தம் மறைவு; 75 ஆண்டுகால ஹிந்து சமூகப் பணிக்கு முற்றுப்புள்ளி

விஸ்வ ஹிந்து பரிஷத்தின் முன்னோடி தலைவரும், ஹிந்து சமூகப் பணிக்காக தனது வாழ்நாளை அர்ப்பணித்தவருமான எஸ். வேதாந்தம், வயது மூப்பு காரணமாக 93வது வயதில் காலமானார். கேரள மாநிலம் கொல்லத்தில் 1933ல் பிறந்த அவர், 16வது வயதிலேயே ஆர்எஸ்எஸ் இயக்கத்தில் இணைந்தார். பட்டப்படிப்புக்குப் பிறகு திருநெல்வேலியில் பணியாற்றியபடியே 1950ல் தேசிய மற்றும் ஹிந்து சமூகப் பணியைத் தொடங்கினார். பின்னர் ஆர்எஸ்எஸ் முழுநேர ஊழியராக செயல்பட்டு, திருநெல்வேலி, தூத்துக்குடி மற்றும் கன்னியாகுமரி மாவட்டங்களில் அமைப்பின் வளர்ச்சிக்காக பணியாற்றினார். தொடர்ந்து விஸ்வ ஹிந்து பரிஷத்தில் இணைந்த அவர், மாநில அமைப்பு செயலாளர் முதல் அகில உலக செயல் தலைவர் வரை பல்வேறு முக்கிய பொறுப்புகளை வகித்தார். ஹிந்து சமூகத்தின் ஒற்றுமை, சமயப் பணிகள், கல்வி மற்றும் சமூக சேவை ஆகிய துறைகளில் பல்வேறு முயற்சிகளை முன்னெடுத்தார். 1967ல் இடிந்தகரை மீனவர்களின் தாய்மதத் திரும்புதல் நடவடிக்கையில் முக்கிய பங்காற்றிய அவர், 1975ல் மேற்கு மாம்பலத்தில் ஹிந்து வித்யாலயா கல்வி முயற்சியைத் தொடங்கினார். இன்று விஸ்வ ஹிந்து வித்யா கேந்திரா மூலம் பல கல்வி நிறுவனங்கள் செயல்பட்டு வருகின்றன. அதே ஆண்டில் அவரது முயற்சியால் தொடங்கப்பட்ட 'ஹிந்து மித்திரன்' தமிழ் மாத இதழ், பண்பாடு மற்றும் கலாசார கருத்துக்களை மக்களிடம் கொண்டு செல்லும் பணியில் தொடர்ந்து செயல்பட்டு வருகிறது. 1982ல் ஞானரதம் மற்றும் சக்தி ரதம் போன்ற சமயப் பிரசார முயற்சிகளையும் அவர் தொடங்கினார். 1986ல் 'அரசே ஆலயத்தை விட்டு வெளியேறு' என்ற கோரிக்கையை வலியுறுத்தி கன்னியாகுமரி முதல் சென்னை வரை நடைபெற்ற ஆயிரம் கி.மீ. பாதயாத்திரைக்கும் அவர் தலைமை தாங்கினார். கிராமக் கோவில் பூசாரிகளின் நலனை மேம்படுத்தும் நோக்கில் 1990ல் கிராமக்கோவில் பூசாரிகள் பேரவையை உருவாக்கினார். பூசாரிகளுக்கான பயிற்சி முகாம்கள், நலத்திட்டங்கள் மற்றும் பொருளாதார மேம்பாட்டு முயற்சிகளிலும் அவர் தீவிரமாக செயல்பட்டார். 2000ல் தொடங்கப்பட்ட ஓராசிரியர் பள்ளிகள் மூலம் கிராமப்புற மாணவர்களுக்கு கல்வி வழங்கும் முயற்சியையும் முன்னெடுத்தார். கல்வி மட்டுமின்றி, மருத்துவ சேவைகள் மற்றும் பல்வேறு சமூகநலப் பணிகளிலும் அவரது பங்களிப்பு குறிப்பிடத்தக்கதாக அமைந்தது. 75 ஆண்டுகளுக்கும் மேலாக தேசிய மற்றும் ஹிந்து சமூகப் பணியில் ஈடுபட்ட எஸ். வேதாந்தம், ஆகஸ்ட் 29 காலை 11.45 மணிக்கு காலமானார். அவரது இறுதிச் சடங்குகள் ஆகஸ்ட் 30 மாலை சென்னை மேற்கு மாம்பலத்தில் நடைபெறுகிறது. அவரது மறைவுக்கு மத்திய அமைச்சர் எல். முருகன் உள்ளிட்ட பல்வேறு தலைவர்கள் இரங்கல் தெரிவித்துள்ளனர். விஸ்வ ஹிந்து பரிஷத்தின் வளர்ச்சி, கல்வி, மருத்துவம் மற்றும் கிராமப்புற பூசாரிகளின் மேம்பாட்டிற்காக எஸ். வேதாந்தம் ஆற்றிய பணிகள் என்றும் நினைவுகூரப்படும் என அவர் தெரிவித்துள்ளார்.