செம்மஞ்சேரி சர்வதேச விளையாட்டு நகரத் திட்டத்தில் திருப்பம்: ரூ.206 கோடி கட்டுமான ஒப்பந்தம் ரத்து

சென்னை செம்மஞ்சேரியில் சர்வதேச தரத்தில் 'மெகா ஸ்போர்ட்ஸ் சிட்டி' அமைக்கும் திட்டத்தின் ரூ.205.89 கோடி கட்டுமான ஒப்பந்தத்தை தமிழ்நாடு விளையாட்டு மேம்பாட்டு ஆணையம் ரத்து செய்துள்ளது. இதனால், மொத்தம் ரூ.261 கோடி மதிப்பில் அறிவிக்கப்பட்ட இந்த முக்கிய திட்டத்தின் எதிர்காலம் குறித்து கேள்வி எழுந்துள்ளது. தமிழகத்தை விளையாட்டுத் துறையில் முன்னணி மாநிலமாக உருவாக்கும் நோக்கில், முந்தைய தி.மு.க. அரசு செம்மஞ்சேரியில் சர்வதேச விளையாட்டு நகரம் அமைக்கும் திட்டத்தை அறிவித்தது. இதற்கான கட்டுமான டெண்டர் கடந்த ஜனவரியில் வெளியிடப்பட்டது. தொடர்ந்து, பிப்ரவரி 18ல் அன்றைய முதல்வர் ஸ்டாலின் திட்டத்திற்கு அடிக்கல் நாட்டினார். பின்னர், கட்டுமானப் பணிகளை மேற்கொள்ள ரூ.205.89 கோடியில் தனியார் நிறுவனத்திற்கு ஒப்பந்தம் வழங்கப்பட்டது. இந்நிலையில், கடந்த மே 10ல் முதல்வர் விஜய் தலைமையில் த.வெ.க. அரசு பதவியேற்றது. அதன்பின், சர்வதேச விளையாட்டு நகரத்திற்கான கட்டுமான ஒப்பந்தத்தை தமிழ்நாடு விளையாட்டு மேம்பாட்டு ஆணையம் ரத்து செய்துள்ளது. செம்மஞ்சேரி திட்டம் முழுமையாக கைவிடப்படுகிறதா அல்லது புதிய வடிவத்தில் செயல்படுத்தப்படுமா என்பது குறித்து அரசு தரப்பில் இதுவரை அதிகாரப்பூர்வ அறிவிப்பு வெளியாகவில்லை. இதற்கிடையில், சென்னை நேரு விளையாட்டு அரங்கை ஒலிம்பிக் பவனாக மாற்றும் திட்டத்தை விளையாட்டுத் துறை அமைச்சர் ஆதவ் அர்ஜுனா அறிவித்துள்ளார். இதனால், செம்மஞ்சேரி விளையாட்டு நகரத் திட்டத்தில் மாற்றம் செய்ய அரசு முடிவு செய்துள்ளதாக தகவல்கள் தெரிவிக்கின்றன. விளையாட்டு மேம்பாட்டு ஆணைய அதிகாரிகள் கூறுகையில், செம்மஞ்சேரியில் திட்டமிடப்பட்ட இடம் மழைக்காலங்களில் வெள்ளம் மற்றும் மழைநீர் தேக்கத்தால் பாதிக்கப்படும் பகுதி என தெரிவித்துள்ளனர். மழைநீர் வெளியேறும் இயற்கை வழித்தடத்திற்கு அருகில் பெரிய விளையாட்டு உள்கட்டமைப்பு அமைப்பது பொருத்தமாக இருக்காது என்றும் கூறப்படுகிறது. அதே நேரத்தில், ஏற்கனவே திட்டமிடப்பட்டதைவிட பெரிய அளவில் விளையாட்டு நகரத்தை உருவாக்கவும், ஆசிய விளையாட்டு போட்டிகள் உள்ளிட்ட முக்கிய சர்வதேச போட்டிகளை நடத்தும் வகையில் திட்டத்தை மறுவடிவமைக்கவும் அரசு பரிசீலித்து வருவதாக அதிகாரிகள் தெரிவித்துள்ளனர். முக்கிய விளையாட்டு உள்கட்டமைப்பு திட்டத்தின் ஒப்பந்தம் ரத்து செய்யப்பட்டுள்ள நிலையில், இதற்கான காரணங்களையும், புதிய திட்ட வடிவத்தையும் தமிழக அரசு அதிகாரப்பூர்வமாக விளக்க வேண்டும் என விளையாட்டு ஆர்வலர்கள் வலியுறுத்தியுள்ளனர்.