அக்னிவீரர்களுக்கு 20% வேலை ஒதுக்கீடு: மாநிலங்களுக்கு மத்திய உள்துறை அமைச்சக அறிவுரை

இந்திய முப்படைகளில் இளைஞர்களை குறுகிய காலத்திற்கு பணியில் அமர்த்தும் அக்னிபத் திட்டம் மூலம் தேர்வாகும் இளைஞர்கள் ‘அக்னிவீரர்கள்’ என அழைக்கப்படுகின்றனர். இந்த திட்டத்தின் கீழ் அவர்கள் நான்கு ஆண்டுகள் சேவையாற்றுகின்றனர். சேவை முடிவில், சிறப்பாக செயல்படும் 25% பேருக்கு நிரந்தர வேலை வழங்கப்படும். மீதமுள்ள 75% அக்னிவீரர்கள் பணியில் இருந்து விடுவிக்கப்படுகின்றனர். அவர்களின் எதிர்கால வேலைவாய்ப்பை உறுதிப்படுத்தும் வகையில் மத்திய அரசு பல்வேறு முயற்சிகளை மேற்கொண்டு வருகிறது. இந்த நிலையில், 2027 ஆம் ஆண்டில் சேவை நிறைவு செய்யும் அக்னிவீரர்களுக்கு வேலைவாய்ப்பில் 20% ஒதுக்கீடு வழங்குமாறு மத்திய உள்துறை அமைச்சகம் அனைத்து மாநில அரசுகளுக்கும் கடிதம் அனுப்பியுள்ளது. இந்த ஒதுக்கீடு வனத்துறை, சுரங்க பாதுகாப்பு, காவல்துறை கான்ஸ்டபிள்கள், தீயணைப்பு துறை, சிறைச்சாலை காவலர்கள், குதிரைப்படை மற்றும் மாநில பேரிடர் மீட்பு படை போன்ற பணிகளில் வழங்கப்படலாம். மத்திய உள்துறை அமைச்சர் அமித் ஷா இந்த நடவடிக்கையை முன்னெடுத்துள்ளார். ஹரியானா மற்றும் உத்தரகண்ட் போன்ற மாநிலங்கள் ஏற்கனவே அக்னிவீரர்களுக்கு காவல்துறை உள்ளிட்ட பணிகளில் ஒதுக்கீடு அறிவித்துள்ளன.