அம்பாசமுத்திரத்தில் மீண்டும் சுவாமி சிலைகள் சேதம்: உடனடி நடவடிக்கைக்கு வலியுறுத்தல்

திருநெல்வேலி: அம்பாசமுத்திரத்தில் தாமிரபரணி ஆற்றங்கரையில் பொதுமக்கள் வழிபட்டு வரும் சுவாமி சிலைகள் மர்ம நபர்களால் மீண்டும் சேதப்படுத்தப்பட்ட சம்பவம் பரபரப்பை ஏற்படுத்தியுள்ளது. திருநெல்வேலி மாவட்டம் அம்பாசமுத்திரத்தில் தாமிரபரணி ஆற்றங்கரையில் சிவன், விநாயகர், முருகர் உள்ளிட்ட சுவாமி சிலைகள் அமைக்கப்பட்டுள்ளன. அப்பகுதி மக்கள் பல ஆண்டுகளாக இந்த சிலைகளை வழிபட்டு வருகின்றனர். கடந்த ஜூலை 26ம் தேதி மர்ம நபர்கள் சிலைகளை சேதப்படுத்தினர். இதுதொடர்பாக போலீசில் புகார் அளிக்கப்பட்டிருந்த நிலையில், இதுவரை குற்றவாளிகள் கைது செய்யப்படவில்லை என கூறப்படுகிறது. இந்நிலையில், நேற்று மீண்டும் அதே பகுதியில் இருந்த சுவாமி சிலைகள் மற்றும் மயில் வாகனம் உள்ளிட்டவை மர்ம நபர்களால் உடைக்கப்பட்டுள்ளன. முந்தைய சம்பவத்தில் போலீசார் உடனடியாக நடவடிக்கை எடுத்திருந்தால், இதுபோன்ற மறுபடியும் சம்பவம் நடந்திருக்காது என ஹிந்து முன்னணி குற்றம்சாட்டியுள்ளது. சிலைகளை சேதப்படுத்தியவர்களை உடனடியாக கைது செய்து, அப்பகுதியில் உள்ள வழிபாட்டு இடங்களுக்கு உரிய போலீஸ் பாதுகாப்பு வழங்க வேண்டும் என ஹிந்து முன்னணி மாநில செயலர் குற்றாலநாதன் வலியுறுத்தியுள்ளார்.