பொது நிகழ்ச்சிகளில் தமிழ்த்தாய் வாழ்த்து முதலில் பாட வேண்டும்: சட்டசபையில் ஒருமனதாக தீர்மானம்

சென்னை: தமிழகத்தில் நடைபெறும் பொது நிகழ்ச்சிகளில் தமிழ்த்தாய் வாழ்த்தை முதலில் பாட வேண்டும் என வலியுறுத்தும் தீர்மானம், சட்டசபையில் அனைத்து கட்சிகளின் ஆதரவுடன் ஒருமனதாக நிறைவேற்றப்பட்டது. தீர்மானத்தை முன்மொழிந்து பேசிய முதல்வர் விஜய், தமிழ் என்பது வெறும் மொழி மட்டுமல்ல; அது தமிழர்களின் உயிர், உணர்வு, நாகரிகம் மற்றும் பண்பாட்டின் அடையாளம் என குறிப்பிட்டார். தமிழின் தொன்மையையும் பெருமையையும் பிரதிபலிக்கும் தமிழ்த்தாய் வாழ்த்து, தமிழகத்தின் பொது நிகழ்ச்சிகளில் முதன்மையான இடத்தைப் பெற வேண்டும் என்றும் அவர் வலியுறுத்தினார். 1970ம் ஆண்டு முதல் தமிழக அரசு நிகழ்ச்சிகளில் தமிழ்த்தாய் வாழ்த்து முதலில் பாடப்பட்டு வருவது மரபாக உள்ளது என்றும், இந்த நடைமுறையில் அரசு எந்த சமரசமும் செய்யாது என்றும் முதல்வர் தெரிவித்தார். தீர்மானத்தில், தமிழ் உலகின் தொன்மையான செம்மொழிகளில் ஒன்றாகவும், தமிழர் நாகரிகம் பழமையான பண்பாட்டு மரபுகளில் ஒன்றாகவும் திகழ்வதாக சட்டசபை பெருமையுடன் பதிவு செய்துள்ளது. மனோன்மணியம் சுந்தரனார் இயற்றிய மனோன்மணீயம் நாடகத்திலிருந்து எடுக்கப்பட்ட தமிழ்த்தாய் வாழ்த்து, 1970 நவம்பர் 23 முதல் அரசு விழாக்களில் பாடப்பட்டு வருகிறது. பின்னர் 2021 டிசம்பர் 17 முதல் இது மாநிலப் பாடலாக அதிகாரப்பூர்வ அங்கீகாரம் பெற்றது. தமிழகத்தில் உள்ள கல்வி நிறுவனங்கள், பல்கலைக்கழகங்கள், அரசு அலுவலகங்கள், பொதுத்துறை நிறுவனங்கள் உள்ளிட்ட பொது அமைப்புகளின் நிகழ்ச்சிகளில் நிகழ்வு தொடங்குவதற்கு முன் தமிழ்த்தாய் வாழ்த்து கட்டாயம் பாடப்பட வேண்டும் என்றும் தீர்மானத்தில் வலியுறுத்தப்பட்டுள்ளது. தீர்மானத்தை பல்வேறு கட்சிகளைச் சேர்ந்த எம்.எல்.ஏ.,க்கள் வரவேற்றதை தொடர்ந்து, அது ஒருமனதாக நிறைவேற்றப்பட்டது. இதற்கிடையே, அரசு நிகழ்ச்சிகளில் தமிழ்த்தாய் வாழ்த்தை முதலில் பாட வேண்டும் என உத்தரவிடக் கோரி தாக்கல் செய்யப்பட்ட பொதுநல மனுவும் நீதிமன்றத்தில் விசாரணைக்கு வந்தது. மத்திய அரசின் புதிய அறிவிப்பில் வந்தே மாதரம் மற்றும் தேசிய கீதம் தொடர்பான நடைமுறைகள் குறிப்பிடப்பட்டிருந்தாலும், தமிழ்த்தாய் வாழ்த்தை கடைசியில் பாட வேண்டும் என எந்த உத்தரவும் பிறப்பிக்கப்படவில்லை என்று மத்திய அரசு தரப்பில் தெரிவிக்கப்பட்டது.