அறநிலையத்துறை வணிக சொத்துகளில் ரூ.250 கோடி வாடகை நிலுவை; விரைவு வசூலுக்கு அமைச்சர் ரமேஷ் உத்தரவு

தமிழகத்தில் அறநிலையத்துறை கட்டுப்பாட்டில் உள்ள கோவில்களுக்கு சொந்தமான வணிக வளாகங்கள் மற்றும் கட்டடங்களில் இருந்து வசூலிக்க வேண்டிய வாடகை நிலுவை ரூ.250 கோடியை எட்டியுள்ளதாக தகவல் வெளியாகியுள்ளது. இதுகுறித்து அமைச்சர் ரமேஷ் தலைமையில் நடைபெற்ற ஆய்வு கூட்டத்தில், நிலுவைத் தொகையை விரைவாக வசூலிக்க தேவையான நடவடிக்கைகளை மேற்கொள்ளுமாறு மண்டல இணை ஆணையர்களுக்கு உத்தரவு வழங்கப்பட்டது. ஆய்வுக் கூட்டத்தில், கோவில் நில ஆக்கிரமிப்புகள் தொடர்பாக புகார் அளிக்கும்போது உள்ளூர் போலீசார் வழக்குகளை பதிவு செய்ய தயக்கம் காட்டுவதாக அதிகாரிகள் தெரிவித்தனர். இதையடுத்து, புகார்களை இணையதளம் மூலமாக பதிவு செய்யும் நடைமுறையை பின்பற்றுமாறு அமைச்சர் ஆலோசனை வழங்கியுள்ளார். மேலும், கோவில் குடியிருப்புகளில் வசிப்போரில் குறைந்த அளவிலான வாடகைதாரர்கள் மட்டுமே முறையாக வாடகை செலுத்துவதாகவும், பலர் குடியிருப்பு பகுதிகளை வணிக பயன்பாட்டிற்கு மாற்றியுள்ளதாகவும் அதிகாரிகள் தெரிவித்தனர். இதனால் நிலுவைத் தொகை மற்றும் அபராதத் தொகைகளை வசூலிப்பதில் சிக்கல்கள் நீடிப்பதாக கூறப்பட்டது. அதேநேரத்தில், பல கோவில்களில் நிதி மற்றும் இடவசதி பற்றாக்குறை காரணமாக புதிய கட்டுமானப் பணிகளை மேற்கொள்ள முடியாத நிலை இருப்பதாகவும், செயல்படுத்த இயலாத பழைய அறிவிப்புகளை திரும்பப் பெறுவதற்கான முன்மொழிவுகளை அரசுக்கு அனுப்புமாறு அதிகாரிகளுக்கு அறிவுறுத்தப்பட்டுள்ளது.