அ.தி.மு.க. மீண்டும் பிளவா? பழனிசாமி – முன்னாள் அமைச்சர்கள் மோதல் தீவிரம்

சமீபத்தில் நடைபெற்ற சட்டசபை தேர்தலில் கடுமையான தோல்வியை சந்தித்த அ.தி.மு.க.வில் உள்ளக முரண்பாடுகள் தீவிரமடைந்துள்ளன. கட்சி பொதுச்செயலாளர் எடப்பாடி பழனிசாமி மற்றும் முன்னாள் அமைச்சர்கள் இடையே ஏற்பட்ட கடும் வாக்குவாதம், கட்சி மீண்டும் பிளவை நோக்கி செல்கிறது என்ற சந்தேகத்தை உருவாக்கியுள்ளது. 169 தொகுதிகளில் போட்டியிட்ட அ.தி.மு.க. 47 இடங்களில் மட்டுமே வெற்றி பெற்றதுடன், 100க்கும் மேற்பட்ட இடங்களில் டெபாசிட் கூட இழந்துள்ளது. இதனால் கட்சியினரிடையே அதிருப்தி அதிகரித்துள்ளது. சென்னையில் முன்னாள் அமைச்சர்கள் சி.வி. சண்முகம் மற்றும் வேலுமணி இல்லங்களில் நடைபெற்ற ஆலோசனைகளில், பழனிசாமியை பொதுச்செயலாளர் பதவியில் இருந்து நீக்குவது குறித்து பேச்சு நடந்ததாக தகவல்கள் வெளியாகியுள்ளன. மேலும், மாற்று அரசியல் சூழ்நிலைகளை கருத்தில் கொண்டு, வெளியில் இருந்து ஆதரவு வழங்கும் வாய்ப்புகளும் பரிசீலிக்கப்பட்டதாக கூறப்படுகிறது. பின்னர் நடைபெற்ற எம்.எல்.ஏ.க்கள் கூட்டத்தில், வேறு கட்சி நபரை முதல்வராக்குவது குறித்து கருத்து வேறுபாடு ஏற்பட்டது. இதற்கு பழனிசாமி கடுமையாக எதிர்ப்பு தெரிவித்த நிலையில், முன்னாள் அமைச்சர்கள் ஆட்சியை அமைப்பதே முக்கியம் என வலியுறுத்தினர். இந்த விவகாரம் கடும் வாக்குவாதமாக மாறி, சில எம்.எல்.ஏ.க்கள் கூட்டத்திலிருந்து வெளியேறியதும், பின்னர் தனியாக ஆலோசனை நடத்தியதும் பரபரப்பை ஏற்படுத்தியுள்ளது. 35 எம்.எல்.ஏ.க்கள் கையெழுத்து அளித்து தனி நிலைப்பாடு எடுத்ததாகவும் கூறப்படுகிறது. இதன் பின்னணியில், கட்சியில் மேலும் பிளவு ஏற்படாமல் தடுக்க சில மூத்த நிர்வாகிகள் சமரச முயற்சியில் ஈடுபட்டுள்ளனர்.