முதல்வர் விஜய் குறித்து பாக்., சமூக வலைதள பிரசாரம்? 'இன்ப்ளூயன்ஸர்' கணக்குகளை கண்காணிக்கும் உளவுத்துறை

தமிழக முதல்வர் விஜய் குறித்து பாகிஸ்தானைச் சேர்ந்த சமூக வலைதள 'இன்ப்ளூயன்ஸர்கள்' மற்றும் புதிதாக உருவான சில கணக்குகளில் வெளியாகி வரும் பதிவுகள் குறித்து பாதுகாப்பு அமைப்புகள் தீவிரமாக கண்காணித்து வருவதாக தகவல் வெளியாகியுள்ளது. தமிழகத்தில் சமூக வலைதள 'ரீல்ஸ்' மற்றும் டிஜிட்டல் பிரசாரங்களின் தாக்கம் குறித்து அரசியல் விமர்சனங்கள் தொடர்ந்து எழுந்து வருகின்றன. இதற்கிடையே, முதல்வர் விஜயின் அரசியல் செயல்பாடுகள் குறித்து வட மாநிலங்களைச் சேர்ந்த சில சமூக வலைதள பிரபலங்கள் வெளியிட்ட வீடியோக்களும் கவனம் பெற்றன. இந்த நிலையில், பாகிஸ்தானைச் சேர்ந்ததாக கூறப்படும் சில சமூக வலைதள கணக்குகள் மற்றும் 'இன்ப்ளூயன்ஸர்கள்', முதல்வர் விஜய் தொடர்பான வீடியோக்கள் மற்றும் பதிவுகளை வெளியிட்டு வருவதாக குற்றச்சாட்டு எழுந்துள்ளது. 'ஸ்க்ரோல் பாகிஸ்தான்' என்ற முகநூல் பக்கத்தில், முதல்வர் விஜயின் அரசியல் பயணம் குறித்து பதிவு ஒன்று வெளியிடப்பட்டதாக கூறப்படுகிறது. மேலும், பாகிஸ்தானில் உள்ள முகவரி மற்றும் மொபைல் எண்களை பயன்படுத்தி, விஜய் புகைப்படங்களுடன் பல புதிய சமூக வலைதள கணக்குகள் உருவாக்கப்பட்டுள்ளதாக தகவல் வெளியாகியுள்ளது. உளவுத்துறை கண்காணிப்பு தேசிய பாதுகாப்பு தொடர்பான பிரிவுகளுக்கு வந்த புகார்களின் அடிப்படையில், இந்த சமூக வலைதள செயல்பாடுகளை மத்திய உளவுத்துறை கண்காணிக்கத் தொடங்கியுள்ளதாக தகவல்கள் தெரிவிக்கின்றன. உளவுத்துறை வட்டாரங்கள் கூறியதாக வெளியாகியுள்ள தகவலின்படி, சமூக வலைதளங்களில் அதிக பார்வைகள், 'லைக்'குகள் மற்றும் பின்தொடர்பவர்களை உருவாக்குவதற்காக பல நாடுகளில் தனியார் டிஜிட்டல் ஏஜென்சிகள் செயல்படுகின்றன. குறைந்த செலவில் அதிக சமூக வலைதள தொடர்புகளை உருவாக்கும் நோக்கில் வெளிநாடுகளில் உள்ள கணக்குகள் பயன்படுத்தப்படுவதற்கான வாய்ப்பும் இருப்பதாக அதிகாரிகள் சந்தேகிப்பதாக கூறப்படுகிறது. எதற்காக விஜய் பெயரில் கணக்குகள்? பிரபலங்களின் பெயர்களை பயன்படுத்தி சமூக வலைதள கணக்குகளை உருவாக்குவது அதிக பார்வையாளர்களையும் பின்தொடர்பவர்களையும் பெறுவதற்கான ஒரு வழியாக இருக்கலாம் என்றும் விசாரணையில் கவனிக்கப்பட்டு வருவதாக கூறப்படுகிறது. எனினும், இந்த செயல்பாடுகள் வெறும் சமூக வலைதள வர்த்தக நோக்கத்திற்காக நடைபெறுகின்றனவா அல்லது தமிழகத்தில் உள்ள நபர்கள் அல்லது அமைப்புகளுடன் நேரடி தொடர்பு உள்ளதா என்பதே முக்கிய விசாரணை அம்சமாக உள்ளதாக தகவல்கள் தெரிவிக்கின்றன. தேசிய பாதுகாப்பு கோணத்தில் விசாரணை வெளிநாடுகளில் உள்ள சமூக வலைதள பிரபலங்கள் மற்றும் கணக்குகளுடன் தமிழகத்தில் இருந்து நேரடி தொடர்பு இருந்தால், தேசிய பாதுகாப்பு தொடர்பான கவலைகள் எழலாம் என்பதால், இந்த விவகாரம் தீவிரமாக ஆய்வு செய்யப்படுவதாக கூறப்படுகிறது. குறிப்பாக, அரசியல் பிரமுகர்கள் அல்லது அரசு நிர்வாகத்துடன் தொடர்புடையவர்களின் சமூக வலைதள மற்றும் வெளிநாட்டு தொடர்புகள் உள்ளதா என்பது குறித்தும் கண்காணிப்பு மேற்கொள்ளப்படுவதாக தகவல்கள் வெளியாகியுள்ளன. முதல்வர் விஜய் பெயரில் உருவாகும் பாகிஸ்தான் தொடர்புடைய சமூக வலைதள கணக்குகள் வெறுமனே 'லைக்' மற்றும் பார்வையாளர்களை அதிகரிக்கும் நோக்கத்திற்காக செயல்படுகின்றனவா அல்லது அதன் பின்னணியில் வேறு தொடர்புகள் உள்ளனவா என்பது குறித்து பாதுகாப்பு அமைப்புகள் விசாரணை நடத்தி வருவதாக தகவல்கள் தெரிவிக்கின்றன.