நேபாள வெள்ளத்தில் பலி 800ஐ நெருங்கியது; அடையாளம் தெரியாத சடலங்களை அடக்கம் செய்ய அரசு முடிவு

உலக நாடுகளின் கவனத்தை ஈர்த்துள்ள நேபாளத்தின் பேரழிவு வெள்ளத்தில் உயிரிழந்தோர் எண்ணிக்கை 800ஐ நெருங்கியுள்ளது. மேலும், 2,500க்கும் அதிகமானோர் காணாமல் போயுள்ளதால், அவர்களைத் தேடும் மற்றும் மீட்கும் பணிகள் தீவிரமாக நடைபெற்று வருகின்றன. வெள்ளத்தால் பாதிக்கப்பட்ட பகுதிகளில் தொடர்ந்து நடைபெற்று வரும் தேடுதல் பணியின்போது, இடிபாடுகள் மற்றும் வெள்ளம் சூழ்ந்த பகுதிகளில் இருந்து சடலங்கள் மீட்கப்பட்டு வருகின்றன. இதனால் உயிரிழப்பு எண்ணிக்கை மேலும் அதிகரிக்கக்கூடும் என்ற அச்சம் ஏற்பட்டுள்ளது. இந்த பேரிடரில் உயிரிழந்தவர்கள் மற்றும் காணாமல் போனவர்களின் விவரங்களை நேபாள அரசு வெளியிட்டுள்ளது. காணாமல் போன தங்கள் உறவினர்கள் மற்றும் குடும்ப உறுப்பினர்களின் பெயர்கள் உள்ளனவா என்பதை பொதுமக்கள் அந்த பட்டியலில் தேடி வருகின்றனர். பிணவறைகளில் இடப்பற்றாக்குறை மீட்கப்படும் உடல்கள் பிணவறைகளில் வைக்கப்பட்டு, டிஎன்ஏ மாதிரிகள் சேகரிக்கப்படுகின்றன. பின்னர் அடையாளம் காணப்பட்ட உடல்கள் சம்பந்தப்பட்ட குடும்பத்தினரிடம் ஒப்படைக்கப்பட்டு வருகின்றன. ஆனால் பேரழிவில் உயிரிழந்தோரின் எண்ணிக்கை அதிகரித்து வருவதால், பல பகுதிகளில் உள்ள பிணவறைகள் நிரம்பியுள்ளன. சித்வான் மாவட்டத்தில் இதுவரை யாரும் உரிமை கோராத 70 உடல்களை அரசு நல்லடக்கம் செய்துள்ளதாக அதிகாரிகள் தெரிவித்துள்ளனர். அடையாளம் தெரியாத உடல்களுக்கு நல்லடக்கம் பிணவறைகளில் போதிய இடம் இல்லாததால், அடையாளம் காணப்படாத உடல்களை அரசு நல்லடக்கம் செய்யத் திட்டமிட்டுள்ளதாக தகவல் வெளியாகியுள்ளது. அடையாளம் தெரியாத அனைத்து உடல்களிடமிருந்தும் டிஎன்ஏ மாதிரிகள் பாதுகாப்பாக சேகரித்து வைக்கப்படும் என அதிகாரிகள் தெரிவித்துள்ளனர். எதிர்காலத்தில் காணாமல் போனவர்களின் உறவினர்கள் அடையாளம் உறுதி செய்யும் பட்சத்தில், அந்த உடல்கள் நல்லடக்கம் செய்யப்பட்ட இடத்திலிருந்து மீட்கப்பட்டு, சம்பந்தப்பட்ட குடும்பத்தினரின் மத மற்றும் கலாசார நடைமுறைகளுக்கு ஏற்ப இறுதிச் சடங்குகள் நடத்த வாய்ப்பு ஏற்படுத்தப்படும் என அதிகாரிகள் தெரிவித்துள்ளனர்.