இந்தியா–பாகிஸ்தான் எல்லையில் சாலையில் ஹெலிகாப்டர்களை தரையிறக்கி இந்திய ராணுவம் ஒத்திகை

ஜெய்சல்மார்: ராஜஸ்தானில் இந்தியா–பாகிஸ்தான் சர்வதேச எல்லைக்கு அருகே, இந்திய ராணுவ வீரர்கள் முக்கிய சாலையில் ஹெலிகாப்டர்களை தரையிறக்கி சிறப்பு ஒத்திகையை மேற்கொண்டனர். ஜெய்சல்மார் பகுதியில் நடைபெற்ற இந்த பயிற்சியில் அப்பாச்சி, எல்.சி.எச்., சீட்டா உள்ளிட்ட வகைகளைச் சேர்ந்த 4 முதல் 5 ராணுவ ஹெலிகாப்டர்கள் பங்கேற்றதாக தகவல்கள் தெரிவிக்கின்றன. வழக்கமான விமானத் தளங்களில் தரையிறங்க முடியாத சூழ்நிலைகளில், மாற்று தரையிறங்கும் பகுதிகளை பயன்படுத்தி ஹெலிகாப்டர்களை இயக்கும் திறனை மேம்படுத்தும் நோக்கில் இந்த ஒத்திகை நடத்தப்பட்டதாக கூறப்படுகிறது. எல்லைப் பகுதிகளில் அவசரகால சூழ்நிலைகளில் விரைவாக செயல்படுவதற்கான ராணுவத்தின் தயார்நிலையை இந்தப் பயிற்சி வெளிப்படுத்துகிறது. எனினும், ஒத்திகையின் குறிப்பிட்ட நோக்கம் குறித்து இந்திய ராணுவம் அதிகாரப்பூர்வமாக எந்த தகவலையும் வெளியிடவில்லை.