காலத்தால் அழியாத பாரதத்தின் ஆன்மிக சின்னம் – சோம்நாத் கோவில்

குஜராத் மாநிலத்தின் அரபிக்கடல் கரையில் அமைந்துள்ள புனிதமான சோம்நாத் கோவில், பாரதத்தின் ஆன்மிக வலிமையையும் பண்பாட்டு பெருமையையும் உலகிற்கு எடுத்துக்காட்டும் வரலாற்றுச் சின்னமாக திகழ்கிறது. பல முறை தாக்குதல்களை எதிர்கொண்டபோதிலும், மீண்டும் மீண்டும் எழுந்து நின்ற இந்த ஆலயம், இந்திய நாகரிகத்தின் அழியாத மனவலிமையின் அடையாளமாக பார்க்கப்படுகிறது. 1951 ஆம் ஆண்டு மே 11 அன்று, அந்நாளைய ஜனாதிபதி டாக்டர் ராஜேந்திர பிரசாத் அவர்களால் புதுப்பிக்கப்பட்ட சோம்நாத் கோவில் திறந்து வைக்கப்பட்டது. அதன் 75 ஆண்டு நிறைவு நிகழ்ச்சியில் பங்கேற்கும் வாய்ப்பு கிடைத்தது மகிழ்ச்சி அளிப்பதாக பிரதமர் நரேந்திர மோடி தெரிவித்துள்ளார். சோம்நாத் கோவில் மீது நடைபெற்ற முதல் படையெடுப்பு சம்பவத்திற்கான 1000 ஆண்டு நினைவு விழாவாக நடைபெற்ற “சோம்நாத் சுவாபிமான் பர்வ்” நிகழ்வும் வரலாற்று முக்கியத்துவம் வாய்ந்ததாக அமைந்தது. இந்த கோவில் நமக்கு ஒரு முக்கியமான உண்மையை உணர்த்துகிறது என்று பிரதமர் குறிப்பிட்டார். அதாவது, எத்தனை சவால்கள் வந்தாலும் தன்னம்பிக்கையுடனும் கண்ணியத்துடனும் மீண்டும் எழுந்து நிற்க முடியும் என்பதே அந்த உண்மை. சர்தார் வல்லபபாய் படேலின் கனவாக இருந்த சோம்நாத் கோவில் புனரமைப்பு, சுதந்திர இந்தியாவின் ஆன்மிக மறுமலர்ச்சிக்கான முக்கிய கட்டமாக அமைந்தது. 1947 ஆம் ஆண்டு தீபாவளி நாளில் கோவில் இடிபாடுகளுக்கு நடுவில் நின்று அதை மீண்டும் எழுப்ப வேண்டும் என்ற உறுதியை அவர் எடுத்தார். பின்னர் மக்கள் ஆதரவுடன் கோவில் புனரமைக்கப்பட்டு, 1951ல் திறக்கப்பட்டது. இன்று சோம்நாத் முதல் காசி வரை, அயோத்தி முதல் கேதார்நாத் வரை பல ஆன்மிக தலங்கள் பாரம்பரியத்தை பாதுகாத்தபடி நவீன வசதிகளுடன் மேம்படுத்தப்பட்டு வருகின்றன. ஒவ்வொரு இந்தியரும் வாழ்நாளில் ஒருமுறை சோம்நாத் கோவிலை தரிசிக்க வேண்டும் என்று பிரதமர் அழைப்பு விடுத்துள்ளார்.