ஈரோடு மாவட்டம் பெருந்துறையில் அ.தி.மு.க. சார்பில் நடைபெற்ற "மக்களை காப்போம்; தமிழகத்தை மீட்போம்" என்ற தேர்தல் பிரசார கூட்டத்தில் கட்சியின் பொதுச்செயலர் பழனிசாமி கலந்து கொண்டு பேசினார். மகளிர் தினத்தை முன்னிட்டு ரோஸ் நிற பலூன்களை பறக்கவிட்டு மகளிருக்கு வாழ்த்து தெரிவித்தார்.
பின்னர் உரையாற்றிய அவர், தமிழகத்தில் விரைவில் தேர்தல் அறிவிப்பு வெளியாகும் என்றும் அடுத்த மாதம் தேர்தல் நடைபெற வாய்ப்பு உள்ளதாகவும் தெரிவித்தார். தி.மு.க. கூட்டங்களில் முதல்வர் ஸ்டாலின், அ.தி.மு.க.வை பா.ஜ.க. அழித்து விடும் என்று கூறுவது உண்மையல்ல என்றும், எந்த சக்தியும் அ.தி.மு.க.வை அழிக்க முடியாது என்றும் கூறினார்.
மேலும் முன்னாள் முதல்வர் பன்னீர்செல்வம் குறித்து பேசும்போது, அவர் அ.தி.மு.க.வில் இருந்தபோது மரியாதை இல்லை என கூறியதைக் கடுமையாக விமர்சித்தார். ஜெயலலிதா மறைவுக்குப் பின் நடந்த அரசியல் சூழலில், பன்னீர்செல்வம் தி.மு.க.வின் பக்கம் சென்றதாகவும் அவர் குற்றம் சாட்டினார்.
தி.மு.க.வில் குடும்ப அரசியல் நிலவி வருவதாகவும், கருணாநிதி குடும்பத்தினரே கட்சி மற்றும் ஆட்சியில் முக்கிய பதவிகளை பெறுகின்றனர் என்றும் பழனிசாமி கூறினார். கருணாநிதி உயிருடன் இருந்த காலத்திலும் ஸ்டாலினுக்கு முழு அதிகாரம் வழங்கப்படவில்லை என்றும் அவர் தெரிவித்தார்.
அதேபோல் தி.மு.க. எதிர்க்கட்சியாக இருக்கும் போது ஒரு நிலைப்பாடு, ஆளும் கட்சியாக இருக்கும் போது வேறு நிலைப்பாடு எடுத்துக்கொள்கிறது என்றும் அவர் குற்றம் சாட்டினார். தி.மு.க. ஆட்சியில் பல துறைகளில் ஊழல் நடைபெற்றதாகவும் பழனிசாமி தனது உரையில் கூறினார்.
கருத்துகள்
இன்னும் கருத்துகள் இல்லை. முதலில் கருத்து சொல்லுங்கள்!
கருத்து சொல்லுங்கள்