பாகிஸ்தானில் 30-க்கும் மேற்பட்ட லஷ்கர் பயங்கரவாதிகள் கொல்லப்பட்டனர்? வைரல் வீடியோவில் அதிர்ச்சி தகவல்

பாகிஸ்தானில் கடந்த சில ஆண்டுகளில் லஷ்கர்-இ-தொய்பா அமைப்பின் 30-க்கும் மேற்பட்ட முக்கிய உறுப்பினர்கள் மற்றும் நிர்வாகிகள் மர்மமான தாக்குதல்களில் உயிரிழந்ததாகக் கூறப்படும் வீடியோ ஒன்று சமூக வலைதளங்களில் பரவி வருகிறது. மும்பை 2008 தாக்குதல் உள்ளிட்ட பல்வேறு பயங்கரவாதச் செயல்களில் தொடர்புடையதாகக் கருதப்படும் லஷ்கர்-இ-தொய்பா அமைப்பு பாகிஸ்தானை தலைமையிடமாகக் கொண்டு செயல்பட்டு வருகிறது. இந்த நிலையில், இந்தியாவில் நடந்த தாக்குதல் சம்பவங்கள் தொடர்பாக தேடப்பட்டு வந்ததாகக் கூறப்படும் லஷ்கர் அமைப்பின் மூத்த உறுப்பினர் ரிஸ்வான் ஹனிப் வெளியிட்டதாக கூறப்படும் வீடியோவில், கடந்த நான்கு ஆண்டுகளில் பெஷாவர், கராச்சி, ராவல்பிண்டி, ராவல்கோட், முசாபராபாத் மற்றும் பாகிஸ்தான் ஆக்கிரமிப்பு காஷ்மீர் உள்ளிட்ட பகுதிகளில் அமைப்பின் முக்கிய தலைவர்கள் மற்றும் நிர்வாகிகள் பலர் கொல்லப்பட்டதாக தெரிவிக்கப்பட்டுள்ளது. அந்த வீடியோவில், உயிரிழந்தவர்களின் எண்ணிக்கை 30-ஐ கடந்துள்ளதாகவும் கூறப்பட்டுள்ளது. இந்த வீடியோவின் நம்பகத்தன்மை மற்றும் அதில் இடம்பெற்றுள்ள தகவல்கள் குறித்து இந்திய பாதுகாப்பு மற்றும் உளவு அமைப்புகள் ஆய்வு மேற்கொண்டுள்ளதாக தகவல்கள் வெளியாகியுள்ளன. இருப்பினும், சம்பவங்கள் தொடர்பாக அதிகாரப்பூர்வமான மற்றும் சுயாதீன உறுதிப்படுத்தல் வெளியாகவில்லை.