பெங்களூரு அணி ‘நம்பர் 11’ ஜெர்சியுடன் அஞ்சலி… 11 ரசிகர்களை நினைவுகூரும் உணர்ச்சி தருணம்

பெங்களூரு: கடந்த ஆண்டு பிரிமியர் கிரிக்கெட் லீக்கில் சாம்பியன் பட்டம் வென்ற பெங்களூரு அணி, ரசிகர்களின் ஆதரவுடன் வரலாற்று வெற்றியை பெற்றது. இதனை கொண்டாட 2025 ஜூன் 4ஆம் தேதி சின்னசாமி மைதானத்தில் வெற்றி விழா நடத்தப்பட்டது. அப்போது கேப்டன் ரஜத் படிதார் மற்றும் முன்னணி வீரர் விராட் கோலி உள்ளிட்டவர்களை பார்க்க ஆயிரக்கணக்கான ரசிகர்கள் திரண்டனர். ஆனால், மைதான நுழைவில் ஏற்பட்ட திடீர் நெரிசல் காரணமாக 11 ரசிகர்கள் உயிரிழந்தது பெரும் சோகத்தை ஏற்படுத்தியது. இந்த 11 பேரின் நினைவாக, பெங்களூரு அணி நிர்வாகம் சிறப்பு நடவடிக்கைகளை அறிவித்துள்ளது. வருகிற 28ஆம் தேதி நடைபெற உள்ள முதல் லீக் போட்டிக்கு முன், வீரர்கள் ‘நம்பர் 11’ பொறிக்கப்பட்ட ஜெர்சி அணிந்து பயிற்சி மேற்கொள்வார்கள். மேலும், அவர்கள் கருப்பு பட்டை அணிந்து அஞ்சலி செலுத்தவுள்ளனர். அத்துடன், சின்னசாமி மைதானத்தில் 11 இருக்கைகள் நிரந்தரமாக காலியாக வைக்கப்படும். “இந்த ரசிகர்கள் எங்களுடன் என்றும் இருப்பார்கள்” என்பதற்கான அடையாளமாக இந்த முயற்சி மேற்கொள்ளப்பட்டுள்ளது. மேலும், ரசிகர்களின் பாதுகாப்பை உறுதி செய்ய ரூ.7 கோடி செலவில் புதிய கட்டுப்பாட்டு அமைப்புகள் கொண்டு வரப்பட்டுள்ளன. மைதானம் முழுவதும் ஏ.ஐ. தொழில்நுட்பத்துடன் கூடிய சிசிடிவி கேமராக்கள் பொருத்தப்பட்டுள்ளன. இந்நிலையில், பெங்களூரு அணியின் வேகப்பந்து வீச்சாளர் யாஷ் தயாள் தனிப்பட்ட பிரச்சினைகளால் இந்த தொடரில் பங்கேற்க மாட்டார். அவர் மீது வந்துள்ள குற்றச்சாட்டுகள் காரணமாக அவர் முழு தொடரையும் தவிர்க்கிறார். எனினும், அணியினர் அவருக்கு ஆதரவாக இருப்பதாக நிர்வாகம் தெரிவித்துள்ளது.