தேங்கும் வழக்குகள்: நுகர்வோர் ஆணையத்தில் சீர்திருத்தம் தேவை என உச்ச நீதிமன்றம் கருத்து

தேசிய நுகர்வோர் குறைதீர் ஆணையத்தில் நிலுவையில் உள்ள வழக்குகளை விரைவாக முடிக்க, நாடு முழுவதும் மண்டல மற்றும் சுழற்சி கிளைகளை அமைப்பது குறித்து மத்திய அரசு பரிசீலிக்க வேண்டும் என்று உச்ச நீதிமன்றம் அறிவுறுத்தியுள்ளது. நுகர்வோர் வழக்குகளின் எண்ணிக்கை தொடர்ந்து அதிகரித்து வரும் நிலையில், தேசிய, மாநில மற்றும் மாவட்ட அளவிலான நுகர்வோர் குறைதீர் ஆணையங்களின் செயல்பாடுகளை உச்ச நீதிமன்றம் தொடர்ந்து கண்காணித்து வருகிறது. இந்த வழக்கை விசாரித்த நீதிபதிகள் சூர்யகாந்த், ஜாய்மால்யா பக்சி மற்றும் வி.மோகனா ஆகியோர் அடங்கிய அமர்வு, தேசிய நுகர்வோர் ஆணையத்தில் வழக்குகள் தேங்கிக் கிடப்பது கவலைக்குரிய விஷயம் என்று தெரிவித்தது. ஒவ்வொரு முறையும் நுகர்வோர்கள் டில்லிக்கு சென்று வழக்குகளைத் தொடர வேண்டிய அவசியம் இருக்கக் கூடாது என்றும், அதற்குப் பதிலாக நுகர்வோர் குறைதீர் அமைப்புகள் மக்களை நேரடியாகச் சென்றடைய வேண்டும் என்றும் நீதிபதிகள் கருத்து தெரிவித்தனர். மேலும், மாநில மற்றும் மாவட்ட நுகர்வோர் குறைதீர் ஆணையங்களின் செயல்பாடுகள் குறித்து செயல்திறன் தணிக்கை நடத்த வேண்டும் என்றும், ஓய்வுபெற்ற நீதிபதிகளின் புனர்வாழ்வு மையங்களாக இந்த அமைப்புகள் மாறிவிடக் கூடாது என்றும் உச்ச நீதிமன்றம் எச்சரித்தது. தேசிய நுகர்வோர் ஆணையத்தில் நிலுவையில் உள்ள வழக்குகள், உறுப்பினர்களின் எண்ணிக்கை மற்றும் வழக்குகள் தீர்க்கப்படும் வேகம் தொடர்பான விரிவான அறிக்கையை இரண்டு வாரங்களுக்குள் தாக்கல் செய்யவும் நீதிமன்றம் உத்தரவிட்டுள்ளது.