நீட், எப்.சி.ஆர்.ஏ., சட்டங்களுக்கு எதிராக தமிழக சட்டசபையில் 2 தீர்மானங்கள் நிறைவேற்றம்

சென்னை: மத்திய அரசின் சட்டங்கள் தொடர்பாக தமிழக சட்டசபையில் நேற்று இரண்டு முக்கிய தீர்மானங்கள் ஒருமனதாக நிறைவேற்றப்பட்டன. நீட் நுழைவுத்தேர்வை ரத்து செய்ய வலியுறுத்தியும், வெளிநாட்டு நிதி பங்களிப்பு ஒழுங்குமுறை சட்டம் எனப்படும் எப்.சி.ஆர்.ஏ., சட்டத்திருத்தத்தை திரும்பப் பெறக் கோரியும் இந்த தீர்மானங்கள் கொண்டு வரப்பட்டன. மருத்துவ மாணவர் சேர்க்கைக்கான நீட் தேர்வு, சமூக நீதி, சமத்துவம் மற்றும் மாநில உரிமைகளுக்கு எதிரானதாக இருப்பதாக தமிழக அரசு தனது தீர்மானத்தில் தெரிவித்துள்ளது. குறிப்பாக, கிராமப்புற மற்றும் பொருளாதாரத்தில் பின்தங்கிய மாணவர்களுக்கு நீட் தேர்வு பாதிப்பை ஏற்படுத்துவதாகவும், பயிற்சி மையங்களின் எண்ணிக்கையும் செலவும் அதிகரித்துள்ளதாகவும் கூறப்பட்டுள்ளது. தமிழகத்திற்கு நீட் தேர்வில் இருந்து விலக்கு அளிக்கக் கோரும் சட்ட மசோதா ஏற்கனவே தமிழக சட்டசபையில் நிறைவேற்றப்பட்டதை சுட்டிக்காட்டிய அரசு, மருத்துவ மாணவர் சேர்க்கையை பிளஸ் 2 மதிப்பெண்கள் அடிப்படையில் நடத்தும் வகையில் தொடர்புடைய மத்திய சட்டங்களில் திருத்தம் செய்ய வேண்டும் என வலியுறுத்தியது. இதனைத் தொடர்ந்து, எப்.சி.ஆர்.ஏ., சட்டத்திருத்தம் தொடர்பான இரண்டாவது தீர்மானம் நிறைவேற்றப்பட்டது. வெளிநாட்டு நிதி பெறும் தொண்டு நிறுவனங்களின் பதிவு ரத்து செய்யப்பட்டாலோ அல்லது புதுப்பிக்கப்படாமல் போனாலோ, அவற்றின் சொத்துக்களை நிர்வகிக்க மத்திய அரசுக்கு அதிகாரம் வழங்கும் புதிய நடைமுறை குறித்து தமிழக அரசு கவலை தெரிவித்தது. இந்த சட்டத்திருத்தம் தொண்டு நிறுவனங்களின் தன்னாட்சி மற்றும் சிறுபான்மையினர் நடத்தும் கல்வி, சமூகநல நிறுவனங்களின் செயல்பாடுகளை பாதிக்கக்கூடும் எனக் கூறிய தமிழக அரசு, மசோதாவை திரும்பப் பெற்று, மாநில அரசுகள், தொண்டு நிறுவனங்கள், மத மற்றும் கல்வி அமைப்புகள் உள்ளிட்ட அனைத்து தரப்பினருடனும் மத்திய அரசு ஆலோசனை நடத்த வேண்டும் என வலியுறுத்தியது. இரு தீர்மானங்களுக்கும் தி.மு.க., அ.தி.மு.க., காங்கிரஸ், பா.ம.க., வி.சி.க., இடதுசாரி கட்சிகள், முஸ்லிம் லீக் உள்ளிட்ட பல்வேறு கட்சிகள் ஆதரவு தெரிவித்தன. இதையடுத்து தீர்மானங்கள் குரல் ஓட்டெடுப்பு மூலம் நிறைவேற்றப்பட்டன. பா.ஜ., எதிர்ப்பு நீட் தேர்வுக்கு எதிரான தீர்மானத்தையும், எப்.சி.ஆர்.ஏ., சட்டத்திருத்தத்திற்கு எதிரான தீர்மானத்தையும் எதிர்த்து பா.ஜ., எம்.எல்.ஏ., போஜராஜன் வெளிநடப்பு செய்தார். நீட் தேர்வு ஏழை மாணவர்களுக்கும் மருத்துவக் கல்விக்கான வாய்ப்பை உருவாக்குவதாகவும், எப்.சி.ஆர்.ஏ., சட்டத்திருத்தம் வெளிநாட்டு நிதி தவறாக பயன்படுத்தப்படுவதை தடுக்கும் நோக்கத்துடன் கொண்டுவரப்பட்டுள்ளதாகவும் அவர் தெரிவித்தார். எப்.சி.ஆர்.ஏ., சட்டத்திருத்தம் குறித்து மத்திய அரசின் விளக்கம் எப்.சி.ஆர்.ஏ., பதிவு ரத்து செய்யப்பட்டாலோ அல்லது புதுப்பிக்கப்படாமல் போனாலோ, சம்பந்தப்பட்ட தொண்டு நிறுவனம் உடனடியாக மூடப்படாது என மத்திய அரசின் தரப்பில் விளக்கம் அளிக்கப்பட்டுள்ளது. வெளிநாட்டு நன்கொடைகளை பெறுவதற்கான சட்டப்பூர்வ அனுமதி மட்டுமே பாதிக்கப்படும் என்றும், உள்நாட்டு நன்கொடைகள், சி.எஸ்.ஆர்., நிதி மற்றும் உறுப்பினர் பங்களிப்புகள் மூலம் அமைப்புகள் தொடர்ந்து செயல்பட முடியும் என்றும் தெரிவிக்கப்பட்டுள்ளது. வெளிநாட்டு நிதி மூலம் உருவாக்கப்பட்ட சொத்துக்களை முறையாக பாதுகாத்து, அவை தவறாக பயன்படுத்தப்படுவதை தடுப்பதே சட்டத்திருத்தத்தின் நோக்கம் என மத்திய அரசு கூறுகிறது. கூட்டுக்குழுவுக்கு அனுப்பப்படுமா? எப்.சி.ஆர்.ஏ., சட்டத்திருத்த மசோதாவை பார்லிமென்ட் கூட்டுக்குழுவுக்கு அனுப்புவது குறித்து மத்திய அரசு பரிசீலித்து வருவதாக தகவல் வெளியாகியுள்ளது. காங்கிரஸ், சமாஜ்வாதி, தி.மு.க., உள்ளிட்ட எதிர்க்கட்சிகள் மசோதாவை திரும்பப் பெற வலியுறுத்தி வரும் நிலையில், சில கட்சிகள் மறு ஆய்வுக்காக கூட்டுக்குழுவுக்கு அனுப்பலாம் என கருத்து தெரிவித்துள்ளன.