விண்வெளி கழிவுகளை அகற்றி இந்தியா புதிய சாதனை

விண்வெளி கழிவுகளை கட்டுப்படுத்தும் சர்வதேச கொள்கைகளை பின்பற்றி, ராக்கெட்டின் மேல்பகுதியை ஒன்பது மாதங்களுக்குள் பூமிக்குத் திருப்பி, இந்திய விண்வெளி ஆய்வு நிறுவனம் புதிய சாதனையை படைத்துள்ளது. கடந்த ஆண்டு நவம்பர் 2ஆம் தேதி, ஆந்திர மாநிலம் ஸ்ரீஹரிகோட்டாவில் இருந்து எல்.வி.எம்.3 - எம்5 ராக்கெட் மூலம் சி.எம்.எஸ்-3 தகவல் தொடர்பு செயற்கைக்கோள் வெற்றிகரமாக விண்ணில் செலுத்தப்பட்டது. செயற்கைக்கோள் தனது சுற்றுப்பாதையில் பிரிக்கப்பட்ட பிறகு, ராக்கெட்டின் மேல்பகுதி பாதுகாப்பான முறையில் விண்வெளியில் சுற்றிக் கொண்டிருந்தது. அதன் இயக்கத்தை ஸ்ரீஹரிகோட்டாவில் உள்ள ரேடார் அமைப்புகள் தொடர்ந்து கண்காணித்தன. காலப்போக்கில் அந்த ராக்கெட் பாகம் பூமியை நோக்கி நகர்ந்தது. வளிமண்டலத்தில் நுழைந்தபோது ஏற்பட்ட அதிக வெப்பம் காரணமாக அதன் பெரும்பாலான பகுதிகள் எரிந்து அழிந்தன. மீதமிருந்த சில பகுதிகள் ஜூலை 30ஆம் தேதி அட்லான்டிக் பெருங்கடலில் விழுந்ததாக இஸ்ரோ உறுதிப்படுத்தியுள்ளது. பொதுவாக ராக்கெட்டின் பாகங்கள் பல ஆண்டுகள் விண்வெளி கழிவுகளாக சுற்றிக் கொண்டிருக்கும். ஆனால், இந்த முறை திட்டமிட்ட நடவடிக்கைகள் மூலம் ஒன்பது மாதங்களிலேயே அவற்றை அகற்றி, விண்வெளியை சுத்தமாக வைத்திருப்பதில் இந்தியா முன்னுதாரணமாக திகழ்கிறது.