தென் ஆப்ரிக்கா அசத்தல் வெற்றி: நியூசிலாந்து தோல்வி, தொடர் சமநிலை

வெலிங்டனில் நடைபெற்ற 4வது டி20 போட்டியில் தென் ஆப்ரிக்க அணி 19 ரன்கள் வித்தியாசத்தில் நியூசிலாந்தை வீழ்த்தி தொடரை 2-2 என சமநிலைப்படுத்தியது. முதலில் டாஸ் வென்று பேட்டிங் செய்த தென் ஆப்ரிக்க அணி 20 ஓவர்களில் 5 விக்கெட் இழப்பிற்கு 164 ரன்கள் எடுத்தது. கானர் எஸ்தர்ஹியுசன் 57 ரன்கள் அடித்து அணியின் முக்கிய பங்களிப்பை வழங்கினார். அவருடன் டோனி டி ஜார்ஜி (23), தியான் (19), ஜேசன் ஸ்மித் (19) ஆகியோர் ஆதரவு அளித்தனர். இறுதியில் ரூபின் ஹெர்மன் (28)* மற்றும் ஜார்ஜ் லிண்டே (14)* அவுட்டாகாமல் இருந்தனர். 165 ரன்கள் என்ற இலக்கை நோக்கி களமிறங்கிய நியூசிலாந்து அணி தொடக்கத்தில் நன்றாக விளையாடினாலும், மத்திய கட்டத்தில் விக்கெட்டுகளை இழந்ததால் பின்னடைவு கண்டது. டிம் ராபின்சன் 32 ரன்கள், டேன் கிளீவர் 26 ரன்கள், நிக் கெல்லி 19 ரன்கள் எடுத்தனர். ஆனால் ஜேம்ஸ் நீஷம், பெவன் ஜேக்கப்ஸ், கோல் மெக்கோன்சி, ஜோஷ் கிளார்க்சன் ஆகியோர் எதிர்பார்த்த அளவில் விளையாடவில்லை. இதனால் நியூசிலாந்து அணி 18.5 ஓவர்களில் 145 ரன்களுக்கு ஆல் அவுட்டாகி தோல்வியடைந்தது. அசத்தலான அரைசதம் அடித்த கானர் எஸ்தர்ஹியுசன் ஆட்டநாயகன் விருதை பெற்றார்.