துணை முதல்வர் பதவி விவகாரம்: கூட்டணி பேச்சுவார்த்தையில் விஜய்க்கு புதிய சவால்

சென்னை: தமிழக சட்டசபை தேர்தலில் த.வெ.க. 106 தொகுதிகளில் வெற்றி பெற்றிருந்தாலும், தனித்து ஆட்சி அமைக்க தேவையான பெரும்பான்மை எட்டப்படாத நிலையில் உள்ளது. இதனால், கூட்டணி அமைப்பதற்கான அரசியல் பேச்சுவார்த்தைகள் தீவிரமாக நடைபெற்று வருகின்றன. பெரும்பான்மையை நிரூபிக்க த.வெ.க.க்கு மேலும் 12 இடங்கள் தேவைப்படுகின்றன. இதற்காக காங்கிரஸ் உள்ளிட்ட சில கட்சிகள் ஆதரவு தர சம்மதித்துள்ளன. இருப்பினும், அது மட்டும் போதாத சூழலில், பா.ம.க.வுடனும் பேச்சுவார்த்தை நடைபெற்றதாக தகவல்கள் வெளியாகியுள்ளன. இந்த பேச்சுவார்த்தையில், பா.ம.க. தலைவர் அன்புமணி, துணை முதல்வர் பதவியை தனது மனைவி சவுமியாவுக்கு வழங்க வேண்டும் என கோரிக்கை வைத்துள்ளதாக கூறப்படுகிறது. மேலும், விஜய் ராஜினாமா செய்ய உள்ள ஒரு தொகுதியையும் பா.ம.க. கேட்கிறது. வெறும் ஐந்து தொகுதிகளில் வெற்றி பெற்ற பா.ம.க. இவ்வாறு உயர்ந்த கோரிக்கைகளை முன்வைப்பது, த.வெ.க. தரப்பில் அதிருப்தியை ஏற்படுத்தியுள்ளது. இதனால், காங்கிரஸ், கம்யூனிஸ்ட் மற்றும் வி.சி.க. போன்ற கட்சிகளுடன் தீவிரமாக மாற்று கூட்டணி முயற்சிகள் நடைபெற்று வருகின்றன. இந்நிலையில், விஜய் விரைவில் எம்.எல்.ஏ.க்களை சந்தித்து, ஆட்சி அமைப்பதற்கான உரிமையை கவர்னரிடம் கோர உள்ளார். பெரும்பான்மையை நிரூபிக்க வழங்கப்படும் கால அவகாசத்தில் தேவையான ஆதரவை திரட்ட அவர் திட்டமிட்டுள்ளார்.