டில்லியில் அனைத்து கட்சி கூட்டம் இன்று: மேற்காசிய பதற்றம் குறித்து மத்திய அரசு ஆலோசனை

மேற்காசிய பிராந்தியத்தில் அதிகரித்து வரும் போர் பதற்றம் மற்றும் அதன் உலகளாவிய தாக்கங்கள் குறித்து ஆலோசிக்க, டில்லியில் இன்று மத்திய அரசு அனைத்து கட்சி கூட்டத்தை நடத்துகிறது. ஈரான் மீது அமெரிக்கா மற்றும் இஸ்ரேல் இணைந்து பிப்ரவரி 28 முதல் மேற்கொண்டுவரும் தாக்குதல்களுக்கு பதிலடி அளித்து வரும் ஈரானின் நடவடிக்கைகள் காரணமாக, அந்தப் பகுதியில் பதற்றமான சூழல் நிலவுகிறது. இந்த சூழலில், உலகின் முக்கிய எண்ணெய் போக்குவரத்து பாதையான ஹார்முஸ் ஜலசந்தியை ஈரான் மூடியுள்ளது. இதன் விளைவாக, உலகளவில் கச்சா எண்ணெய் மற்றும் எரிவாயு விநியோகத்தில் சிக்கல் உருவாகியுள்ளது. இந்தியாவும் இதன் தாக்கத்தை எதிர்கொள்ளும் நிலையில் உள்ளது. இந்த பிரச்சினையை முன்னிட்டு, எதிர்க்கட்சிகள் கோரிக்கை விடுத்ததைத் தொடர்ந்து, இன்று மாலை 5 மணிக்கு டில்லியில் அனைத்து கட்சி கூட்டம் நடைபெறுகிறது. இந்த கூட்டத்திற்கு பாதுகாப்புத்துறை அமைச்சர் ராஜ்நாத் சிங் தலைமை வகிக்கிறார். வெளியுறவு அமைச்சர் எஸ். ஜெய்சங்கர் மற்றும் பாராளுமன்ற விவகார அமைச்சர் கிரண் ரிஜிஜு உள்ளிட்டோர் கலந்து கொள்கிறார்கள். கூட்டத்தில் மேற்காசிய நிலவரம், அங்குள்ள இந்தியர்களின் பாதுகாப்பு, எரிபொருள் கையிருப்பு நிலை, மற்றும் மத்திய அரசு எடுத்துள்ள முன்னெச்சரிக்கை நடவடிக்கைகள் குறித்து விளக்கம் அளிக்கப்படும். இந்நிலையில், பிரதமர் நரேந்திர மோடி, மேற்காசிய பதற்றம் கவலைக்குரியது என்றும், நாட்டின் எரிசக்தி தேவைகளை பூர்த்தி செய்ய மாற்று வழிகள் மேற்கொள்ளப்பட்டு வருவதாகவும் தெரிவித்தார். மேலும், நாட்டின் எரிபொருள் விநியோகத்தை சீராக வைத்திருக்க தேவையான கையிருப்பு உள்ளதாகவும், மாநில அரசுகள் ‘டீம் இந்தியா’வாக இணைந்து செயல்பட வேண்டும் என்றும் அவர் வலியுறுத்தினார். போர் தாக்கத்தை சமாளிக்க, எரிசக்தி, உரம், பணவீக்கம் உள்ளிட்ட துறைகளில் 7 புதிய அதிகார குழுக்கள் அமைக்கப்பட்டுள்ளன. இதற்கிடையில், காங்கிரஸ் கட்சியின் தலைவர் ராகுல் காந்தி இந்த கூட்டத்தில் பங்கேற்க வாய்ப்பில்லை என தகவல் வெளியாகியுள்ளது.