உலகக் கோப்பை கால்பந்து 2026: மெக்சிகோவில் கோலாகல துவக்க விழா

உலகின் மிகப்பெரிய விளையாட்டு திருவிழாவாக கருதப்படும் பிபா உலகக் கோப்பை கால்பந்து தொடரின் 23வது சீசன் மெக்சிகோ, அமெரிக்கா மற்றும் கனடாவில் கோலாகலமாக துவங்கியது. வரலாற்றில் முதல் முறையாக 48 அணிகள் பங்கேற்கும் இந்த தொடரின் துவக்க விழா ரசிகர்களின் உற்சாகக் கொண்டாட்டத்துடன் நடைபெற்றது. மெக்சிகோ சிட்டியில் உள்ள எஸ்டாடியோ அஸ்டெகா மைதானத்தில் நடைபெற்ற விழாவில் ஆயிரக்கணக்கான ரசிகர்கள் கலந்து கொண்டனர். 'கால்பந்து அனைவரையும் ஒன்றிணைக்கிறது' என்ற கருத்தை மையமாகக் கொண்டு கலைநிகழ்ச்சிகள் நடத்தப்பட்டன. மெக்சிகோ இசைக்குழு மானா, லத்தீன் ராப் பாடகர் ஜே பால்வின் மற்றும் உலகப் புகழ்பெற்ற பாடகி ஷகிரா ஆகியோர் நிகழ்ச்சியில் பங்கேற்று ரசிகர்களை உற்சாகப்படுத்தினர். குறிப்பாக ஷகிரா மற்றும் பர்னா பாய் இணைந்து வழங்கிய இசை நிகழ்ச்சி ரசிகர்களின் கைதட்டல்களை பெற்றது. 1970 மற்றும் 1986 உலகக் கோப்பை இறுதிப் போட்டிகளை நடத்திய புகழ்பெற்ற எஸ்டாடியோ அஸ்டெகா மைதானம் மீண்டும் உலகக் கோப்பையை வரவேற்றுள்ளது. மூன்றாவது முறையாக உலகக் கோப்பை போட்டிகளை நடத்தும் முதல் நாடாக மெக்சிகோ புதிய சாதனையையும் படைத்துள்ளது.