செயின்ட் லூயிஸ் ரேபிட் செஸ்: பிரக்ஞானந்தா அசத்தல் வெற்றி, புள்ளிப்பட்டியலில் முதலிடம்

அமெரிக்காவின் செயின்ட் லூயிஸில் நடைபெற்று வரும் சர்வதேச 'ரேபிட் அண்டு பிளிட்ஸ்' செஸ் தொடரில் இந்திய கிராண்ட்மாஸ்டர் ஆர். பிரக்ஞானந்தா சிறப்பான ஆட்டத்தை வெளிப்படுத்தி, முதல் நாள் முடிவில் புள்ளிப்பட்டியலில் முதலிடத்தை பிடித்துள்ளார். செயின்ட் லூயிஸ் செஸ் கிளப் நடத்தும் இந்த தொடரில் உலகின் முன்னணி வீரர்கள் பங்கேற்றுள்ளனர். முதல் சுற்றில் அமெரிக்க வீரர் பெரஸுக்கு எதிரான ஆட்டம் டிராவில் முடிந்தது. இரண்டாவது சுற்றில் அமெரிக்காவின் லெவான் ஆரோனியனை வெள்ளை காய்களுடன் எதிர்கொண்ட பிரக்ஞானந்தா, தொடக்கம் முதலே ஆதிக்கம் செலுத்தி 34வது நகர்த்தலில் வெற்றியை பதிவு செய்தார். தொடர்ந்து நடைபெற்ற மூன்றாவது சுற்றில் மற்றொரு அமெரிக்க வீரர் பேபியானோ காருவானாவை கருப்பு காய்களுடன் சந்தித்தார். 27 நகர்த்தல்கள் வரை சமநிலையில் இருந்த போட்டியில், பின்னர் சிறப்பாக விளையாடிய பிரக்ஞானந்தா 62வது நகர்த்தலில் வெற்றியை கைப்பற்றினார். முதல் நாள் முடிவில் 5 புள்ளிகளுடன் பிரக்ஞானந்தா முதலிடத்தில் உள்ளார். அமெரிக்காவின் வெஸ்லி சோ மற்றும் உஸ்பெகிஸ்தானின் ஜாவோகிர் சிந்தாரோவ் தலா 4 புள்ளிகளுடன் அடுத்த இடங்களில் உள்ளனர்.