காமன்வெல்த் 2026: குல்வீர் சிங், ஹர்ஜிந்தர் கவுர் வெள்ளி வென்று இந்தியாவுக்கு பெருமை

ஸ்காட்லாந்தின் கிளாஸ்கோவில் நடைபெற்று வரும் 2026 காமன்வெல்த் விளையாட்டுப் போட்டியில் இந்திய வீரர்கள் தொடர்ந்து பதக்கங்களை குவித்து வருகின்றனர். ஆடவர் 10,000 மீட்டர் ஓட்டத்தில் குல்வீர் சிங் வெள்ளிப் பதக்கம் வென்று வரலாற்றுச் சாதனை படைத்தார். மழைக்கு மத்தியிலும் நடைபெற்ற போட்டியில் கடைசி கட்டத்தில் வேகத்தை அதிகரித்த குல்வீர் சிங், 27 நிமிடம் 49.78 வினாடிகளில் இலக்கை எட்டி இரண்டாவது இடத்தைப் பிடித்தார். காமன்வெல்த் 10,000 மீட்டர் ஓட்டத்தில் இந்தியா வென்ற முதல் பதக்கம் இதுவாகும். பெண்கள் 69 கிலோ பளுதூக்குதல் பிரிவில் ஹர்ஜிந்தர் கவுர், ஸ்னாட்ச் மற்றும் கிளீன் அண்ட் ஜெர்க் சுற்றுகளில் மொத்தம் 227 கிலோ எடையைத் தூக்கி வெள்ளிப் பதக்கத்தை கைப்பற்றினார். 2022 காமன்வெல்த் போட்டியில் வெண்கலம் வென்றிருந்த அவர், இந்த முறை தனது சாதனையை வெள்ளிப் பதக்கமாக உயர்த்தியுள்ளார். இதன் மூலம் காமன்வெல்த் 2026 பளுதூக்குதல் போட்டியில் இந்தியா இதுவரை ஒரு தங்கம், ஐந்து வெள்ளி மற்றும் ஒரு வெண்கலம் என மொத்தம் ஏழு பதக்கங்களை வென்றுள்ளது. பதக்கம் வென்ற பிறகு பேசிய குல்வீர் சிங், "மழை பெய்தாலும் நாட்டிற்காக பதக்கம் வெல்ல வேண்டும் என்பதே என் இலக்காக இருந்தது. பதக்கம் வென்ற பிறகு காலநிலை பற்றி நினைக்கவே இல்லை" என்று மகிழ்ச்சி தெரிவித்தார்.