குற்றவாளிகள் எந்தக் கட்சியை சேர்ந்தவராக இருந்தாலும் நடவடிக்கை - முதல்வர் விஜய் திட்டவட்டம்

தமிழக சட்டசபை, அரசு விடுமுறைக்குப் பிறகு இன்று மீண்டும் கூடியது. சட்டசபையில் நடைபெற்ற விவாதத்தின் போது முதல்வர் விஜய், சட்டம்-ஒழுங்கு மற்றும் அரசின் செயல்பாடுகள் குறித்து விரிவாக பேசினார். ஒரு மாநிலத்தின் வளர்ச்சியை சாலைகள் மற்றும் தொழிற்சாலைகள் அமைப்பதால் மட்டும் தீர்மானிக்க முடியாது என்று குறிப்பிட்ட முதல்வர் விஜய், சட்டம்-ஒழுங்கு சிறப்பாக இருந்தால்தான் தொழில் முதலீடுகள் அதிகரித்து, தொழில்கள் சுமுகமாக நடைபெறும் என்றார். சட்டத்தை மதித்து நடக்கும் மக்களுக்கு காவல்துறை நம்பிக்கைக்குரிய நண்பனாக இருக்க வேண்டும் என்றும் அவர் தெரிவித்தார். காவல்துறை நடவடிக்கையில் தலையீடு கூடாது முதல்வர், அமைச்சர்கள் அல்லது அதிகாரிகள் என யாராக இருந்தாலும் காவல்துறையின் சட்டப்பூர்வ நடவடிக்கைகளில் தலையிடக் கூடாது என வலியுறுத்தியதாக விஜய் கூறினார். குற்றவாளிகள் யாராக இருந்தாலும், எந்தக் கட்சியை சேர்ந்தவர்களாக இருந்தாலும் சட்டப்படி நடவடிக்கை எடுக்க வேண்டும். சட்டத்தின் முன் அனைவரும் சமம் என்பதே இந்த அரசின் நிலைப்பாடு என்று அவர் திட்டவட்டமாக தெரிவித்தார். அரசியல் பேச்சுகளுக்கு விஜய் கண்டனம் சட்டசபையில் அரசியல் கட்சியினர் பயன்படுத்தும் கடுமையான மற்றும் தரம் தாழ்ந்த பேச்சுகளுக்கும் முதல்வர் விஜய் கண்டனம் தெரிவித்தார். அரசியல் ரீதியாக ஆட்சியை விமர்சிப்பதில் தவறில்லை என்றும், ஆனால் தனிப்பட்ட முறையில் பெண்கள் உள்ளிட்ட யாரையும் இழிவாகவும், அவதூறாகவும் பேசுவதை ஏற்க முடியாது என்றும் அவர் கூறினார். தமிழகத்தில் சமீப காலமாக ஆபாசம் மற்றும் வன்மம் நிறைந்த அரசியல் பேச்சுகள் அதிகரித்து வருவதாகக் குறிப்பிட்ட அவர், இதனை மக்கள் கவனித்துக் கொண்டிருக்கின்றனர் என்றார். பெண்களை இழிவுபடுத்தும் பேச்சுக்கு எதிர்ப்பு பெண்களைப் பற்றி அவதூறாகவும், இரட்டை அல்லது மூன்றாம் பொருள் தரும் வகையிலும் பேசுவதை தவிர்க்க வேண்டும் என்று முதல்வர் கேட்டுக்கொண்டார். பெண்களை இழிவுபடுத்தும் வகையில் யாராவது பேசினால் சட்டம் தனது கடமையை செய்யும் என்றும் அவர் எச்சரித்தார். அரசியல் காழ்ப்புணர்ச்சியுடன் தான் நடவடிக்கை எடுக்கிறோம் என யாரும் கருத வேண்டாம் என்றும், பெண்களுக்கு எதிரான அவமதிப்புகள் எதிர்காலத்தில் நடைபெறக் கூடாது என்பதில் தான் தெளிவாக இருப்பதாகவும் விஜய் தெரிவித்தார். மக்கள் தீர்ப்பை மதிக்க வேண்டும் மக்கள் அளிக்கும் தேர்தல் தீர்ப்பை அனைத்து அரசியல் கட்சிகளும் மதிக்க வேண்டும் என்று முதல்வர் விஜய் வலியுறுத்தினார். மக்களை அவமதிக்கும் வகையில் அரசியல் தலைவர்கள் பேசுவது ஏற்கத்தக்கதல்ல என்றும், மக்கள் தீர்ப்பை ஏற்றுக்கொள்ளும் மனப்பான்மை அரசியலில் இருக்க வேண்டும் என்றும் அவர் தெரிவித்தார். கடந்த கால அரசியலில் இருந்த நல்ல அம்சங்களை மட்டும் எடுத்துக்கொள்வோம் என்றும், அவதூறு மற்றும் தரம் தாழ்ந்த அரசியல் பேச்சுகளை பின்பற்ற வேண்டிய அவசியமில்லை என்றும் அவர் கூறினார். ஊழல் குற்றச்சாட்டுகள் குறித்து பேச்சு சட்டசபையில் தனது மேசையில் சில துறைகள் தொடர்பான கோப்புகள் இருப்பதாகவும், அவற்றை உரிய நேரத்தில் வெளியிடுவதாகவும் ஏற்கனவே தெரிவித்திருந்ததை நினைவுபடுத்திய விஜய், அதற்கு எதிர்க்கட்சியினர் சவால் விடுத்ததாக கூறினார். இதன் தொடர்ச்சியாக, தி.மு.க. ஆட்சியில் நடைபெற்றதாகக் கூறப்படும் பல்வேறு முறைகேடுகள் மற்றும் ஊழல் தொடர்பான குற்றச்சாட்டுகளை அவர் சட்டசபையில் முன்வைத்தார். அரசு ஒப்பந்தங்கள், கட்சி நிதி, மதுபான விற்பனை உள்ளிட்ட பல்வேறு விவகாரங்களில் தி.மு.க. மீது குற்றச்சாட்டுகளை அவர் சுட்டிக்காட்டினார். மேலும், சில குற்றச்சம்பவங்களில் தி.மு.க.வினருக்கு எதிராக வழக்குப் பதிவு செய்வதில் தாமதம் செய்யப்பட்டதாகவும் அவர் குற்றம்சாட்டினார். பெண் காவலரிடம் தவறாக நடந்துகொண்டதாகக் கூறப்படும் சம்பவங்கள் மற்றும் காவல்துறை அதிகாரிகள் மீதான தாக்குதல் உள்ளிட்ட விவகாரங்களையும் விஜய் தனது உரையில் குறிப்பிட்டார். “மக்கள் பணத்தை தொடமாட்டோம்” மக்கள் நலனையே தங்கள் அரசின் முதன்மை நோக்கமாகக் கொண்டுள்ளதாக தெரிவித்த முதல்வர் விஜய், மக்கள் பணத்தில் இருந்து ஒரு ரூபாயைக் கூட தொடமாட்டோம் என்றும், முறைகேட்டில் ஈடுபடுபவர்கள் மீது நடவடிக்கை எடுக்கப்படும் என்றும் கூறினார். தங்கள் அரசு எந்த தனிப்பட்ட கட்சியின் அடையாளத்தையும் முன்னிறுத்தாது என்றும், தமிழ், தமிழர், தமிழ்நாடு என்பதே அரசின் அடையாளம் என்றும் அவர் தெரிவித்தார். தி.மு.க.வினருக்கு “கண்ணாடியை பார்க்க” அறிவுரை சட்டம்-ஒழுங்கு குறித்து தி.மு.க.வினர் விமர்சிப்பதற்கு முன்பு, கடந்த கால ஆட்சியில் நடைபெற்றதாகக் கூறப்படும் சம்பவங்களை நினைவுபடுத்திக் கொள்ள வேண்டும் என்று விஜய் தெரிவித்தார். தங்கள் கட்சியினரும் தவறு செய்தால் பாரபட்சமின்றி நடவடிக்கை எடுக்கப்படும் என்றும், தமிழக மக்களின் நினைவாற்றல் வலிமையானது என்றும் அவர் கூறினார். சட்டசபையில் தி.மு.க. வெளிநடப்பு முதல்வர் விஜய் உரையாற்றிக் கொண்டிருந்தபோது, அவரது கருத்துகளுக்கு எதிர்ப்பு தெரிவித்து தி.மு.க. எம்.எல்.ஏ.க்கள் தொடர்ந்து கோஷங்களை எழுப்பினர். இதையடுத்து அவையில் ஏற்பட்ட அமளி குறித்து சபாநாயகர் தி.மு.க.வினரை கண்டித்தார். போராட்டத்தில் ஈடுபட்ட உறுப்பினர்களை வெளியேற்றவும் உத்தரவிடப்பட்டது. தொடர்ந்து தி.மு.க. எம்.எல்.ஏ.க்கள் சபாநாயகரிடம் பேச வாய்ப்பு கோரி வாக்குவாதத்தில் ஈடுபட்டனர். பின்னர் அவர்கள் அனைவரும் அவையிலிருந்து வெளிநடப்பு செய்தனர்.