'எம்.எல்.ஏ.,க்களை ராஜினாமா செய்ய வைத்ததே அரசின் சாதனை' - பழனிசாமி விமர்சனம்

சென்னை: சட்டசபையில் நடந்த விவாதத்தின்போது, த.வெ.க., அரசை அ.தி.மு.க., பொதுச்செயலர் பழனிசாமி கடுமையாக விமர்சித்தார். மூன்று மாதங்களில் ரூ.24,000 கோடிக்கு மேல் கடன் வாங்கப்பட்டுள்ளதாகவும், இந்த நிலை தொடர்ந்தால் ஐந்து ஆண்டுகளில் கடன் சுமை ரூ.25 லட்சம் கோடியாக உயரக்கூடும் என்றும் அவர் குற்றம் சாட்டினார். அ.தி.மு.க., ஆட்சியில் செயல்படுத்தப்பட்ட திட்டங்களுக்கு புதிய பெயர்கள் சூட்டப்படுவதாகவும், புதிய பஸ்கள் போதுமான அளவில் வாங்கப்படவில்லை என்றும் பழனிசாமி கூறினார். இதற்கு பதிலளித்த அமைச்சர் பார்த்திபன், 1,000 ஏ.சி., மின்சார பஸ்கள் வாங்கப்பட உள்ளதாக தெரிவித்தார். மேலும், தேர்தலில் ஒரு கட்சியின் சார்பில் வெற்றி பெற்ற சில எம்.எல்.ஏ.,க்கள் பதவியை ராஜினாமா செய்து வேறு கட்சியில் இணைந்திருப்பதை சுட்டிக்காட்டிய பழனிசாமி, “மூன்று மாதங்களில் இந்த அரசு செய்த சாதனை இதுதான்” என விமர்சித்தார். இதற்கு பதிலளித்த அமைச்சர் ஆதவ் அர்ஜுனா, அ.தி.மு.க., தலைமையின் மீது நம்பிக்கை இழந்ததால் எம்.எல்.ஏ.,க்கள் வேறு கட்சிக்கு செல்வதாக கூறினார். ஜெயலலிதா ஆட்சிக்குப் பிறகு அ.தி.மு.க.,வின் செயல்பாடுகளில் தங்களுக்கு உடன்பாடு இல்லை என்றும் அவர் தெரிவித்தார். இதனால் சட்டசபையில் அ.தி.மு.க., உறுப்பினர்கள் எதிர்ப்பு தெரிவித்து கோஷமிட்டனர். அமைச்சர் ஆதவ் அர்ஜுனா பேசிய கருத்துகளை சபைக்குறிப்பில் இருந்து நீக்க வேண்டும் என்றும் அவர்கள் வலியுறுத்தினர். இதுகுறித்து ஆய்வு செய்து தேவையான நடவடிக்கை எடுக்கப்படும் என சபாநாயகர் பிரபாகர் தெரிவித்தார்.