தவறான மின் பில்லிங் புகார்கள் அதிகரிப்பு; அதிகாரிகள் மீது நடவடிக்கை எச்சரிக்கை

தமிழகத்தில் மின் பயன்பாடு கணக்கெடுப்பு மற்றும் பில்லிங் முறைகளில் ஏற்படும் குறைபாடுகளால், பல வீட்டு நுகர்வோர் அதிக மின் கட்டணம் செலுத்த வேண்டிய நிலை உருவாகியுள்ளதாக புகார்கள் எழுந்துள்ளன. இதையடுத்து மின்வாரியம் திடீர் ஆய்வுகள் நடத்த உத்தரவிட்டுள்ளது. தமிழக அரசின் 200 யூனிட் இலவச மின்சார திட்டம் அமல்படுத்தப்பட்ட பின்னரும், சில பகுதிகளில் தாமதமான மீட்டர் கணக்கெடுப்பு மற்றும் பழுதான மீட்டர்கள் காரணமாக தவறான கட்டணங்கள் விதிக்கப்படுவதாக நுகர்வோர் குற்றம்சாட்டுகின்றனர். மின்சார பயன்பாடு வழக்கமாக இரண்டு மாதங்களுக்கு ஒருமுறை கணக்கெடுக்கப்படுகிறது. ஆனால் சில இடங்களில் குறிப்பிட்ட காலத்திற்குள் கணக்கெடுப்பு நடைபெறாததால், பயன்பாடு அதிகமாக பதிவாகி, இலவச மின்சார சலுகையின் முழு பயன் கிடைக்காமல் இருப்பதாக கூறப்படுகிறது. இதுகுறித்து வெளியிடப்பட்டுள்ள உள்துறை சுற்றறிக்கையில், சில பிரிவுகளில் அசாதாரணமான பில்லிங் முறைகள் கண்டறியப்பட்டுள்ளதாகவும், இதனால் பொதுமக்களுக்கு நிதி இழப்பு ஏற்பட்டுள்ளதாகவும் குறிப்பிடப்பட்டுள்ளது. அதிகாரிகளுக்கு எச்சரிக்கை மீட்டர் பரிசோதனை, கணக்கெடுப்பு மற்றும் பில்லிங் செயல்முறைகளில் அலட்சியம் காட்டும் பணியாளர்கள் மற்றும் அலுவலர்கள் மீது ஒழுங்கு நடவடிக்கை எடுக்கப்படும் என அதிகாரிகள் எச்சரித்துள்ளனர். மேலும், ஒவ்வொரு மின்பிரிவிலும் திடீர் ஆய்வுகள் மேற்கொண்டு, தவறான கட்டணங்கள் விதிக்கப்பட்டுள்ளதா என்பதை கண்காணிக்க உத்தரவிடப்பட்டுள்ளது. அதிக பில் வந்தால் என்ன செய்ய வேண்டும்? மின் கட்டணம் வழக்கத்தை விட அதிகமாக வந்துள்ளதாக சந்தேகம் இருந்தால், சம்பந்தப்பட்ட மின்வாரிய அலுவலகத்தில் எழுத்துப்பூர்வமாக புகார் அளிக்கலாம். அதன் பின்னர் தொழில்நுட்ப குழு மீட்டரை ஆய்வு செய்து, குறைபாடு இருப்பது உறுதி செய்யப்பட்டால் கட்டண திருத்தம் செய்யப்படும் என அதிகாரிகள் தெரிவித்துள்ளனர். வெயில் காலத்தில் ஏசி, விசிறி மற்றும் பிற மின் சாதனங்களின் பயன்பாடு அதிகரிப்பதும் மின் கட்டண உயர்வுக்கு ஒரு காரணமாக இருக்கலாம் என்றும் மின்வாரியம் விளக்கம் அளித்துள்ளது.