திருப்பாச்சூர் வாசீஸ்வரர் கோவில் அருகே மாட்டிறைச்சி கழிவுகள்: நடவடிக்கை கோரி பக்தர்கள் கோரிக்கை

திருவள்ளூர் மாவட்டம் திருப்பாச்சூரில் அமைந்துள்ள சுமார் 1,800 ஆண்டுகள் பழமையான அருள்மிகு வாசீஸ்வரர் கோவில் வளாகம் மற்றும் அதன் சுற்றுப்பகுதியில் மாட்டிறைச்சி கழிவுகள் கொட்டப்படுவதாக எழுந்துள்ள புகாரால் பக்தர்கள் மற்றும் உள்ளூர் பொதுமக்கள் அதிருப்தி தெரிவித்துள்ளனர். தேவாரப் பாடல் பெற்ற தலங்களில் ஒன்றாக விளங்கும் இந்த வரலாற்றுச் சிறப்புமிக்க சிவாலயத்திற்கு தினமும் ஏராளமான பக்தர்கள் தரிசனத்திற்காக வருகை தருகின்றனர். இந்நிலையில், கோவில் சுற்றுச்சுவரை ஒட்டிய பகுதிகளில் அடிக்கடி மாட்டிறைச்சி கழிவுகள் மற்றும் எலும்புத் துண்டுகள் கொட்டப்படுவதாக கூறப்படுகிறது. இதனால், தெருநாய்கள் அந்தக் கழிவுகளை கோவில் வளாகத்திற்குள் இழுத்துச் செல்வதால், வளாகத்தின் தூய்மை பாதிக்கப்படுவதுடன், பக்தர்களுக்கு அசௌகரியமும் பாதுகாப்பு அச்சமும் ஏற்படுவதாக தெரிவிக்கப்படுகிறது. மேலும், துர்நாற்றம் மற்றும் சுகாதாரப் பிரச்னைகளும் உருவாகியுள்ளதாக உள்ளூர் மக்கள் குற்றம்சாட்டுகின்றனர். இதற்கிடையில், கோவிலுக்குச் சொந்தமான சுமார் 2.15 ஏக்கர் நிலப்பகுதியிலும் சிலர் இறைச்சி கழிவுகளை கொட்டுவதாகவும், இதனால் அந்தப் பகுதியில் கடுமையான சுகாதார சீர்கேடு நிலவுவதாகவும் புகார் எழுந்துள்ளது. பக்தர்கள் கூறுகையில், கழிவுகளை அகற்றுவதற்கு வேறு இடங்கள் இருந்தும், கோவில் மற்றும் அதன் நிலப்பகுதிகளை ஒட்டிய பகுதிகளில் கொட்டப்படுவது மத உணர்வுகளை புண்படுத்துவதாக உணரப்படுவதாக தெரிவித்தனர். சம்பந்தப்பட்ட துறையினர் உடனடியாக விசாரணை நடத்தி, கழிவுகள் கொட்டப்படுவதைத் தடுக்கவும், கோவில் வளாகத்தின் தூய்மையைப் பாதுகாக்கவும் நடவடிக்கை எடுக்க வேண்டும் என அவர்கள் கோரிக்கை விடுத்துள்ளனர்.