உதயநிதி கைது; போலீஸ் விசாரணைக்கு பின் ஜாமினில் விடுதலை

தஞ்சாவூரில் நடைபெற்ற அரசியல் ஆர்ப்பாட்டத்தில் பேசியதாக எழுந்த புகாரின் அடிப்படையில் தி.மு.க. தலைவர் ஸ்டாலின் மகன் உதயநிதி மீது போலீசார் ஒன்பது சட்டப் பிரிவுகளின் கீழ் வழக்குப்பதிவு செய்தனர். இதையடுத்து சென்னை இல்லத்தில் இருந்து அவரை கைது செய்த போலீசார் விசாரணைக்காக தஞ்சாவூர் மாவட்டத்திற்கு அழைத்துச் சென்றனர். இதற்கிடையில் முன்ஜாமின் கோரி சென்னை உயர் நீதிமன்றத்தில் மனு தாக்கல் செய்யப்பட்டது. விசாரணையின்போது, உதயநிதியை நீதிமன்ற காவலில் அடைக்கும் நோக்கம் இல்லை என்றும், விசாரணைக்குப் பிறகு காவல் நிலைய ஜாமினில் விடுவிக்கப்படுவார் என்றும் அரசு தரப்பு தெரிவித்தது. இதனை பதிவு செய்த நீதிமன்றம், விசாரணை முடிந்தவுடன் விடுவிக்க உத்தரவிட்டது. செங்கிப்பட்டி காவல் நிலையத்தில் நடைபெற்ற விசாரணை ஒன்றரை மணி நேரத்திற்கும் மேலாக நீடித்தது. அதன் பின்னர் அதே இரவு உதயநிதி காவல் நிலைய ஜாமினில் விடுவிக்கப்பட்டார். கைது நடவடிக்கையின் போது அவரது இல்லம் முன்பு தி.மு.க. நிர்வாகிகள் மற்றும் தொண்டர்கள் திரண்டதால் பரபரப்பு ஏற்பட்டது. சில இடங்களில் மறியல் போராட்டமும் நடைபெற்றதாக கூறப்படுகிறது. போலீசார் பாதுகாப்பு ஏற்பாடுகளை பலப்படுத்தி நிலைமையை கட்டுக்குள் கொண்டு வந்தனர். உதயநிதி தனது முதல் எதிர்வினையில், கைது நடவடிக்கை அரசியல் நோக்கத்துடன் மேற்கொள்ளப்பட்டதாக குற்றம்சாட்டியதுடன், சட்டரீதியாக வழக்கை எதிர்கொள்வேன் என்றும் தெரிவித்துள்ளார்.