மெஸ்ஸியின் இரட்டை கோல் சாதனை; ஆஸ்திரியாவை வீழ்த்தி ரவுண்டு-16க்கு முன்னேறிய அர்ஜென்டினா

உலகக் கோப்பை கால்பந்து தொடரின் ‘குரூப்-ஜே’ பிரிவு லீக் ஆட்டத்தில் நடப்பு சாம்பியனான அர்ஜென்டினா அணி, ஆஸ்திரியாவை 2-0 என்ற கோல் கணக்கில் வீழ்த்தி ரவுண்டு-16 சுற்றுக்கு முன்னேறியது. டல்லாஸில் நடைபெற்ற இந்த போட்டியின் தொடக்கம் முதலே இரு அணிகளும் கடுமையாக மோதின. ஆட்டத்தின் 9வது நிமிடத்தில் அர்ஜென்டினாவுக்கு கிடைத்த பெனால்டி வாய்ப்பை கேப்டன் லியோனல் மெஸ்ஸி கோலாக மாற்றத் தவறியதால் ரசிகர்கள் ஏமாற்றமடைந்தனர். எனினும், 38வது நிமிடத்தில் மெடினா வழங்கிய பாஸை துல்லியமாக பயன்படுத்திய மெஸ்ஸி, முதல் கோலை அடித்து அணியை முன்னிலை பெறச் செய்தார். இதன் மூலம் உலகக் கோப்பை வரலாற்றில் அதிக கோல்கள் அடித்த வீரர் என்ற புதிய சாதனையை அவர் படைத்தார். இரண்டாவது பாதியின் கூடுதல் நேரமான 90+5வது நிமிடத்தில், நான்கு ஆஸ்திரிய வீரர்களை ஏமாற்றி மெஸ்ஸி அடித்த அற்புத கோல், அர்ஜென்டினாவின் வெற்றியை உறுதி செய்தது. இறுதியில், 2-0 என்ற கோல் கணக்கில் வெற்றி பெற்ற அர்ஜென்டினா அணி, தொடர்ந்து இரண்டாவது வெற்றியை பதிவு செய்து 6 புள்ளிகளுடன் ரவுண்டு-16 சுற்றுக்குத் தகுதி பெற்றது. இந்த போட்டியில் மெஸ்ஸியின் இரட்டை கோல் மற்றும் உலக சாதனை ரசிகர்களை உற்சாகத்தில் ஆழ்த்தியது.