காமன்வெல்த் வெற்றிக்குப் பின் நாடு திரும்பிய இந்திய வீரர்களுக்கு கோலாகல வரவேற்பு

ஸ்காட்லாந்தின் கிளாஸ்கோவில் நடைபெற்ற 23வது காமன்வெல்த் விளையாட்டு போட்டிகளை வெற்றிகரமாக நிறைவு செய்த இந்திய வீரர், வீராங்கனைகளுக்கு தாயகம் திரும்பியதும் உற்சாக வரவேற்பு அளிக்கப்பட்டது. முதல் கட்டமாக பளுதூக்குதல் அணியைச் சேர்ந்த மீராபாய் சானு, லவ்பிரீத் சிங், ராஜா முத்துப்பாண்டி உள்ளிட்டோர் டெல்லி இந்திரா காந்தி சர்வதேச விமான நிலையம் வந்தடைந்தனர். அங்கு ரசிகர்கள் மற்றும் விளையாட்டு ஆர்வலர்கள் அவர்களை உற்சாகமாக வரவேற்று பாராட்டினர். இந்த காமன்வெல்த் தொடரில் இந்திய பளுதூக்குதல் அணி ஒரு தங்கம், ஆறு வெள்ளி மற்றும் ஒரு வெண்கலப் பதக்கம் என மொத்தம் 8 பதக்கங்களை வென்று சிறப்பான சாதனை படைத்தது. தொடர்ந்து மூன்றாவது முறையாக காமன்வெல்த் தங்கம் வென்ற மீராபாய் சானு, இந்த வெற்றி தமக்கு மேலும் பொறுப்பையும் ஊக்கத்தையும் அளிப்பதாக தெரிவித்தார். வரவிருக்கும் ஆசிய விளையாட்டுப் போட்டிகளில் பதக்கம் வெல்வதே தனது அடுத்த இலக்கு என்றும் அவர் கூறினார். +110 கிலோ பிரிவில் வெள்ளிப் பதக்கம் வென்ற லவ்பிரீத் சிங், வெறும் ஒரு கிலோ வித்தியாசத்தில் தங்கம் தவறியதாகக் கூறி, ஆசிய விளையாட்டில் தங்கம் வெல்ல தீவிரமாக தயாராக இருப்பதாக தெரிவித்தார். 58 கிலோ பிரிவில் வெண்கலம் வென்ற பிந்தியாராணி, ரசிகர்களின் ஆதரவுக்கு நன்றி தெரிவித்து, எதிர்கால போட்டிகளில் மேலும் சிறப்பாக செயல்பட உறுதியளித்தார். 60 கிலோ பிரிவில் வெள்ளிப் பதக்கம் வென்ற ராணுவ வீரர் ரிஷிகாந்தா சிங், மணிப்பூரில் அமைதி நிலவ வேண்டும் என்றும், அங்கு இருந்து மேலும் பல திறமையான விளையாட்டு வீரர்கள் உருவாக வேண்டும் என்றும் தனது விருப்பத்தை வெளிப்படுத்தினார்.