இரண்டாவது வெற்றியை நோக்கி இந்திய பெண்கள் அணி; இன்று ஹாங்காங்குடன் மோதல்

துபாயில் நடைபெற்று வரும் 2026 மகளிர் ஆசிய கோப்பை டி-20 கிரிக்கெட் தொடரில் இந்திய அணி இன்று தனது இரண்டாவது லீக் போட்டியில் ஹாங்காங் அணியை எதிர்கொள்கிறது. இந்திய நேரப்படி இரவு 8 மணிக்கு போட்டி தொடங்குகிறது. தொடக்க போட்டியில் தாய்லாந்தை 94 ரன்கள் வித்தியாசத்தில் வீழ்த்திய இந்தியா, இரண்டாவது வெற்றியை பெற்று அரையிறுதி வாய்ப்பை மேலும் வலுப்படுத்தும் முனைப்பில் உள்ளது. ஷபாலி வர்மா 64 ரன்கள் எடுத்த நிலையில், தீப்தி சர்மா மற்றும் நந்தினி சர்மா தலா 3 விக்கெட்டுகள் வீழ்த்தி இந்திய வெற்றியில் முக்கிய பங்கு வகித்தனர். முதல் போட்டியில் இந்தியாவின் தொடக்க பேட்டிங் சிறப்பாக இருந்தபோதும், நடுப்பகுதியில் அடுத்தடுத்து விக்கெட்டுகள் வீழ்ந்தது கவலை அளித்தது. ஹாங்காங்குக்கு எதிராக ஸ்மிருதி மந்தனா, ஷபாலி வர்மா, பிரதிகா ராவல் மற்றும் கேப்டன் ஹர்மன்ப்ரீத் கவுர் ஆகியோர் பேட்டிங்கில் நிலையான பங்களிப்பு அளிப்பார்கள் என எதிர்பார்க்கப்படுகிறது. பந்துவீச்சில் தீப்தி சர்மா, நந்தினி சர்மா, ஸ்ரீ சரணி உள்ளிட்டோர் மீண்டும் இந்திய அணியின் முக்கிய பலமாக இருப்பார்கள். மறுபுறம், ஹாங்காங் அணி தனது முதல் போட்டியில் தாய்லாந்திடம் தோல்வியடைந்ததால், இந்தியாவுக்கு எதிராக அதிர்ச்சி அளிக்கும் வெற்றியை பதிவு செய்யும் நோக்கில் களமிறங்கும். இன்று நடைபெறும் போட்டியில் வெற்றி பெற்றால், இந்திய அணியின் அரையிறுதி வாய்ப்பு மேலும் பிரகாசமாகும். இந்தியா, பாகிஸ்தான், தாய்லாந்து மற்றும் ஹாங்காங் ஆகியவை 'ஏ' பிரிவில் இடம் பெற்றுள்ள நிலையில், ஒவ்வொரு பிரிவிலிருந்தும் முதல் இரு அணிகள் அரையிறுதிக்கு தகுதி பெறும்.